Áıteke bı kenti men Qazaly qalasy biriktiriledi
QYZYLORDA. QazAqparat - Qyzylorda oblysy Qazaly aýdanynyń ortalyǵy - Áıteke bı kenti men Qazaly qalasy biriktiriletin boldy, dep habarlaıdy QazAqparat tilshisi.
Bul jóninde Qyzylorda oblysy ákiminiń baspasóz qyzmeti málim etti.
Búgin Qyzylorda oblysynyń ákimi Qyrymbek Kósherbaev Qazaly aýdanynda arnaıy issaparmen bolyp, munda qurylys jumystarynyń barysymen tanysty.
Qazirgi tańda aýdan ortalyǵyn ulǵaıtý jáne abattandyrý maqsatynda tıisti is-sharalar qolǵa alynyp otyr. Aýdan ortalyǵy - Áıteke bı kenti men Qazaly qalasyna biriktirý boıynsha jumystar júrgizilýde.
Aýdan ortalyǵy - Áıteke bı kentinde qazirgi tańda 40 myńǵa jýyq adam turady. Al Qazaly qalasynda 7 myńnyń shamasynda turǵyn bar. Aýdan ortalyǵy men Qazaly qalasynyń ara qashyqtyǵy -12 shaqyrym.
«Eki eldi meken arasyn 11 gektar aýmaq bólip jatyr. Onda aldaǵy ýaqytta 24 kásipkerlik nysan salý josparlanyp otyr. Sondaı-aq, Qazaly qalasynyń avtomobıl jolyn qaıta jańartý boıynsha jobalyq-smetalyq qujattamasy daıyndaldy», - deıdi jergilikti mamandar.
Budan basqa, 600 oryndyq mádenıet úıi men mekemeler qurylysy júrgizilýde, 250 oryndyq 12 eki qabatty turǵyn úı qurylysy jobasy daıyndaldy jáne jabyq bazar salýǵa jer ýchaskesi bólindi.
Búgin Qazaly aýdanynda memlekettik rámizder alańy ashyldy. Aýdandyq sot ǵımaraty da paıdalanýǵa berildi.
Buǵan deıin aýdanda Áıteke bı eskertkishi ashylǵanyn habarlaǵan edik.
