Áıteke bı aýdanynda ákelerge arnalǵan saıabaq salyndy

AQTÓBE. QazAqparat - Aqtóbe oblysyna qarasty Áıteke bı aýdany, Qarabutaq aýylynda Ákeler saıabaǵy salyndy, dep habarlaıdy QazAqparat tilshisi.

Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasynyń «Týǵan jerge taǵzym» jobasy aıasynda kásipker Qaırat Qoılybaev ózi týyp-ósken aýylǵa saıabaq saldy. Aýyl turǵyndarynyń demalysyna arnalǵan oryn qurylysyna 20 mıllıon teńge jumsalǵan. Saıabaqta balalardyń oıyn alańy, sýburqaq jáne «Qarabutaqtyń ataqty tulǵalary» atty stend bar. Munda barlyǵy 600 kóshet egilip, qurylys eki aıda aıaqtaldy. Saıabaqta merekelik keshterdi ótkizýge arnalǵan sahna da qarastyrylǵan.

«Adamdarǵa, onyń ishinde balalarǵa qýanysh syılaý - biz úshin baqyt eken. Syıymyz aýyldastaryma unady dep oılaımyn. Qazirgi kezde kásipkerler týǵan jerine kómektesip, úlken isterdi tyndyryp jatyr. Elimizde Ulttyq kásipkerler palatasynyń bastamasy da qoldaý taýyp, bıznestiń áleýmettik jaýapkershiligi artty»,- deıdi kásipker Qaırat Qoılybaev.

Ákeler saıabaǵyna eresekter ǵana emes, balalar da barady. Al mektep oqýshylary úshin fýtbol alańy bar. Jasandy jabyndysy bar fýtbol alańy jaryqtandyrylyp, syrty qorshalǵan. Munda qysta muz aıdynyn salý josparda bar. Ári tennıs ústeli, voleıbol alańy jasaqtaldy.

Aıta keteıik, kásipker aýyl balalaryn bıyl jazǵy lagerge, Astana qalasyna jiberdi.