Áıteke bı aýdanyndaǵy sý bógetiniń buzylýyna baılanysty merdigerdiń ústinen is qozǵaldy
AQTÓBE. KAZINFORM - Aqtóbe oblysynyń prokýratýrasy Áıteke bı aýdanyndaǵy Şerbakov bógetiniń buzylý deregine qatysty qylmystyq isti tirkedi. Bul týraly prokýratýra habarlady.
Aqtóbe oblysynyń Áıteke bı aýdanynda 30 naýryzda sý tasqyny saldarynan Şerbakov bógeti buzyldy.
Sý basý qaýpine baılanysty aýdannyń jergilikti atqarýshy jáne ýákiletti organdary T.Júrgenov atyndaǵy aýyl turǵyndaryn evakýatsııalaý týraly sheshim qabyldady.
Barlyǵy 178 jeke turǵyn-úıden 927 adam (onyń ishinde 215-i balalar) evakýatsııalanyp, 78 turǵyn-úıdi sý basyp, 10 úı qırady.
Bóget buzylǵandyqtan, Yrǵyz ózeni arnasynan tasydy.
Sý tasqynynyń saldarynan elektr jáne gazben jabdyqtaý jelileri zaqymdandy. T.Júrgenov atyndaǵy aýyl jaryq pen sýsyz sondaı-aq gazsyz qaldy.
Prokýratýra mamandarynyń habarlaýynsha, Şerbakov bógeti «Aqtóbe oblysynyń tabıǵı resýrstar jáne tabıǵı resýrstardy retteý basqarmasy» MM-niń balansyna tıesili.
«2023 jyly memlekettik satyp alý sharty negizinde, „Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy“ MM (tapsyrys berýshi) men «SK Grand kanaly» ÓK (merdiger) arasynda jasalǵan kelisim-shartqa sáıkes, bógetti jóndeý jumystary júrgizilip, paıdalanýǵa berilgen. Alaıda, sý tasqyny nysannyń talapqa saı salynbaǵynyn ári mindetin durys atqara almaıtynyn dáleldep berdi. Saldarynan turǵyndardyń quqyqtary men zańdy múddelerine, T.Júrgenov atyndaǵy aýyl uıymdaryna eleýli zııan keltirdi» — delingen habarlamada.
Bolǵan mán-jaıdy eskere otyryp, Aqtóbe oblysy Áıteke bı aýdanynyń prokýratýrasy Qazaqstan Respýblıkasynyń Qylmystyq kodeksiniń 371-babynyń 1-bóligi boıynsha (salǵyrttyq) qylmystyq isti tirkeý týraly sheshim qabyldady.
Qazirgi ýaqytta tergeý áreketterin júrgizýdi uıymdastyrý úshin qylmystyq is, Qazaqstan Respýblıkasynyń Sybaılas jemqorlyqqa qarsy is-qımyl agenttiginiń Aqtóbe oblysy boıynsha departamentine joldandy.
Eske sala keteıik, 29 naýryz kúni Aqtóbeniń Áıteke bı aýdanynda tótenshe jaǵdaı jarııalanǵanyn habarlaǵan bolatynbyz. Al, 30 naýryz kúni Aqtóbeniń Áıteke bı aýdanynda Şerbakov bógeti buzylyp, adamdar evakýatsııalandy.
