Aıtbek Amangeldi Talǵarda tóbeles kezinde qaza tapqan balanyń otbasyna tegin 3 advokat taýyp berdi

QONAEV. KAZINFORM – 4 qazan kúni Talǵar qalasynda bolǵan qaıǵyly jaǵdaı qoǵamda úlken rezonans týdyrdy. 16 jastaǵy Sherzat Bolattyń ólimine qatysty is Іshki ister mınıstriniń jeke baqylaýynda. Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi. 

Kisi qolynan qaza tapqan jas jigittiń ata-anasy marqum Saltanat Núkenovanyń aǵasy, quqyq qorǵaýshy Aıtbek Amangeldiden kómek surap, júgindi.

«Biz otbasyǵa tegin qyzmet kórsetýge kelisken úsh advokatty usyndyq. Qazir tergeý júrip jatyr. Advokattar quqyq qorǵaý organdarymen birge zardap shekkenderden suraq-jaýap alýda. Іs boıynsha birqatar saraptama taǵaıyndaldy. Janjal kezinde jigittiń ákesi men aǵasy da zardap shekti», – dep atap ótti Aıtbek Amangeldi.

Aıtýynsha, kinálilerdiń bári jazalanýy kerek jáne tergeý ashyq bolýy tıis.

Marqumnyń otbasyna advokat - Asqar Qaımaqov, Karına Kósherbaeva jáne Maral Jaılaýbaeva kómektesedi. Bul iske quqyq qorǵaýshy Saıda Táýkeleva da qosyldy.

Eske salaıyq, buǵan deıin Talǵar qalasyndaǵy tóbelesten bir adam qaıtys bolǵanyn jazǵanbyz. 

Keıin talǵarlyqtar jasóspirim ólimine baılanysty narazylyqqa shyqty.

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.