Aıtarlyqtaı mólsherde para bergeni úshin bas bostandyǵynan aıyrý merzimi uzartyldy

NUR-SULTAN. QazAqparat – Buryn Qylmystyq kodekstiń 367-babynyń 2-bóliginde kózdelgen «aıtarlyqtaı mólsherde para berý» qylmysy úshin eń joǵary sanktsııa 5 jylǵa deıin bas bostandyǵynan aıyrýdy qurasa, qazirgi jańa redaktsııaǵa sáıkes, jazanyń joǵary shegi 7 jylǵa deıin uzartyldy. Bul týraly «Antikor ortalygy» alańynda ótken brıfıngte Nur-Sultan qalasy boıynsha sybaılas jemqorlyqqa qarsy is-qımyl departamentiniń basshysy Shyńǵys Qabdýla aıtty, dep habarlaıdy QazAqparat tilshisi.

«Jyl sońynda QR DSM burynǵy vıtse-mınıstrine qatysty qylmystyq is sotta qaraldy. Sonymen qatar bıýdjet qarajatyn jymqyrý faktileri boıynsha «Gorkıı atyndaǵy orys teatry» RMK, Astana aımaqtyq elektr jelilik kompanııasy, Nur-Sultan qalasynyń Polıtsııa departamenti, «Sergek», «Astana halyqaralyq áýejaıy» AQ laýazymdy tulǵalaryna qatysty kóp epızodty ister aıaqtaldy, sondaı-aq Ekonomıkalyq tergeý departamentiniń tergeýshisin kinásiz adamdy qylmystyq jaýapkershilikke zańsyz tartý faktisi boıynsha jáne basqa da birqatar ister», - dedi Nur-Sultan qalasy boıynsha sybaılas jemqorlyqqa qarsy is-qımyl departamentiniń basshysy.

Onyń aıtýynsha, Sotqa jiberilgen jáne aqtalmaıtyn negizder boıynsha qysqartylǵan qylmystyq ister boıynsha tıisti uıymdarǵa QR QІJK 200-baby tártibinde 100% usynys engizý qamtamasyz etildi.

«Olar boıynsha 47 tulǵa ákimshilik jáne tártiptik jaýapkershilikke tartyldy, onyń ishinde 23 basshy. Ótken jyldyń 1 qyrkúıegindegi Memleket basshysynyń Qazaqstan halqyna Joldaýynda para berýshiler men deldaldardyń jaýapkershiligin kúsheıtýdi tapsyrdy. Bul tásil halyqaralyq ozyq tájirıbege tolyq sáıkes keletinin atap ótken jón. Laýazymdy adamdardy paraǵa satyp alýmen ádeıi aınalysatyn, ne zańsyz syıaqy berý kezinde deldal bolǵan adamdar, eleýli qylmystyq jaýaptylyqta bolýǵa tıis», - deıdi ol.

Shyńǵys Qabdýla búgingi tańda Memleket basshysynyń tapsyrmasy oryndalǵanyn aıtty.

«Qylmystyq kodekske tıisti túzetýler engizildi. Mysaly, eger buryn Qylmystyq kodekstiń 367-babynyń 2-bóliginde kózdelgen «aıtarlyqtaı mólsherde para berý» qylmysy úshin eń joǵary sanktsııa 5 jylǵa deıin bas bostandyǵynan aıyrýdy qurasa, tıisinshe bul áreket ortasha aýyr qylmys dep tanyldy. Al qazirgi jańa redaktsııaǵa sáıkes, jazanyń joǵary shegi 7 jylǵa deıin ulǵaıtyldy, bul avtomatty túrde aýyr quqyqtyq saldary bar sanatqa – ıaǵnı shartty túrde merziminen buryn bosatýǵa tyıym salý jáne qaýipsizdigi tómen qonys-kolonııasynda jazany birden óteýdiń múmkin emestigi kózdelgen», - deıdi ol.