Aıtarlyqtaı qory bar taqtatas munaı kenishterin ekonomıkalyq aınalymǵa engizgen jón — Prezıdent

ASTANA. KAZINFORM — El ekonomıkasyna jeke ınvestıtsııa tartý — Úkimettiń basty mindeti. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.

— Budan bólek, ıgerilýi tehnologııalyq turǵydan kúrdeli birqatar munaı ken oryndaryn, sondaı-aq aıtarlyqtaı qory bar taqtatas munaı kenishterin ekonomıkalyq aınalymǵa engizgen jón. Mundaı jobalardyń kommertsııalyq tartymdylyǵyn arttyrý úshin Úkimet memlekettik qoldaý sharalaryn qarastyrýy kerek, — dedi Qasym-Jomart Toqaev.

Bul rette Prezıdent ınvestıtsııa tartýda Úkimettiń basty mindetin aıtty.

— Taǵy da qaıtalap aıtamyn: qazirgi jańa geosaıası jáne ekonomıkalyq jaǵdaıda ındýstrııaǵa bolsyn, aýyl sharýashylyǵyna bolsyn, jalpy el ekonomıkasyna jeke ınvestıtsııa tartý — Úkimettiń basty mindeti. Bul strategııa elimizdiń uzaq merzimge arnalǵan ulttyq múddesine saı keledi. Sondyqtan munda otanshyldyqty jeleý etken jalǵan urandar orynsyz dep kúmánsiz aıtýǵa bolady. Sonda ǵana Qazaqstan óz ekonomıkasyna qosymsha ınvestıtsııa tartady, resýrstyq áleýetin arttyrady, jańa óndiristik kásiporyndardyń paıda bolýyna jaǵdaı jasaıdy. Qoǵam meniń ustanymymdy bilsin dep muny ádeıi aıtyp otyrmyn, — dedi Memleket basshysy.

Eske salsaq, Bıyl elimizde alǵash ret taqtatas munaıy óndiriledi.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.

Memleket basshysy 2024 jyldy elimiz oń kórsetkishtermen aıaqtaǵanyn aıtty.

Budan bólek, Qasym-Jomart Toqaev Úkimettiń keńeıtilgen otyrysynda Ortalyq Azııada sý tapshylyǵy kúsheıip turǵanyn eske saldy.