Aısultan Seıitovtiń «QASh» fılmi – Asian Pacific Screen Awards syılyǵyna úmitker
Aısultan Seıitovtiń «QASh» fılmi Asian Pacific Screen Awards syılyǵynyń «Úzdik fılm» jáne «Úzdik operatorlyq jumys» nomınatsııalaryna úmitker atandy, dep habarlaıdy QazAqparat Qara production-ǵa silteme jasap.
Marapattaý rásimi 3 qarashada Aýstralııanyń Gold-Kost qalasynda ótedi. 2007 jyly qurylǵan, bedeldi Asia Pacific Screen Awards marapaty Azııa-Tynyq muhıty aımaǵyndaǵy 70-ten astam el men aımaq rejısserleriniń jumysyn kórsetedi.
«QASh» fılminde 1930 jyldardaǵy jappaı asharshylyq týraly baıandalǵan. Fılm sıýjeti boıynsha qabir qazýshy Isataı óz aýylyn qutqarýǵa attanady. Sheksiz dala túnekke aınalyp, Isataıdyń sanasyn eki kúsh – keńistik pen ashtyq bıleıdi.
Buǵan deıin fılm 25-shi Shanhaı kınofestıvalinde «Úzdik rejısser» atalymyna ıe boldy. Sondaı-aq Qazaqstan kınosynshylar qaýymdastyǵynyń «Úzdik debıýt», «Ekinshi plandaǵy úzdik áıel róli», «Úzdik mýzyka» jáne «Úzdik fotorejısser» nomınatsııalarynda jeńiske jetti.
