Aısultan Seıitov túsirgen klıp MTV Video Music Awards syılyǵyna usynyldy
NUR-SULTAN. QazAqparat – Qazaqstandyq rejısser Aısultan Seıitovtiń klıpi MTV Video Music Awards syılyǵyna usynyldy. Bul týraly ol óziniń Instagram-stories-inde málim etti, dep habarlaıdy QazAqparat tilshisi.
Aısultan Seıitov amerıkalyq rep oryndaýshylary 21 Savage ben J. Cole-diń «A lot» ánine vıdeo túsirdi. Klıp «Jyldyń úzdik vıdeosy» atalymyna usynyldy.
Sondaı-aq, dál osyndaı atalymda Billie Eilish «Bad Guy» ánimen, Ariana Grande - «Thank u, next», Jonas Brothers - «Sucker», Lil Nas X jáne Billy Ray Cyrus – «Old Town Road» (Remix) jáne Taylor Swift - «You Need to Calm Down» ánderimen synǵa túsetin bolady.
«A lot» klıpiniń túsirilimi osy jyldyń qańtar aıynda Atlantada ótken.
MTV Video Music Awards 2019 syılyǵynyń marapattaý rásimi 26 tamyzda Nıý-Djersıde ótedi. Osymen 36-ret ótip otyrǵan jyl saıynǵy shoý tikeleı efırden kórsetiledi dep kútilýde.
Aısultan Seıitov – qazaqstandyq rejısser, klıpmeıker. Nıý-Iork kıno akademııasynda «Rejıssýra» baǵyty boıynsha bilim alǵan. «Hype Production» prodakshn-kompanııasymen birge jumys isteıdi.
Avtor: Aqbota Kúzekbaı
Foto: www.gq.ru
