Aısamal Sansyzbaeva: Aýyr atletıkadan joǵary jetistikke jetýdi qalaımyn
QYZYLORDA. QazAqparat - Aýyr atletıkadan 20 jasqa deıingi jastar arasynda álem chempıony ataǵyn jeńip alǵan qyzylordalyq Aısamal Sansyzbaeva aýyldan shyqqan qarapaıym qyz. Qazirdiń ózinde ol dúnıe júzindegi bapkerler tarapynan joǵary baǵa alyp otyr, dep habarlaıdy QazAqparat tilshisi.
2003 jyly Qyzylorda oblysy Shıeli aýdanynda dúnıege kelgen ol aýyr atletıkamen aınalysqanyna birneshe jyldyń júzi boldy. Qazirge deıin jastar jáne jasóspirimder arasynda Azııa jáne el birinshiliginde júldegerler qatarynan kórindi.
«Aýyr atletıka qyz balasy úshin ońaı sport túri emes. Alǵashqyda ata-anam qarsy boldy. Dese de ziltemirdi kóterý men úshin qıyn tıgen joq. Onyń ádisin tolyq meńgerip aldym. Bul oraıda bapkerlerimniń kómegi kóp tıdi. Beride oblys ortalyǵyndaǵy Jalańtós Bahadúr atyndaǵy olımpıadalyq rezervtiń oblystyq mamandandyrylǵan mektep-ınternatta bilim aldym. Bapkerlerim - Arman Abdraev, Nursultan Bahradın, Muhammed Turysbekov», - dedi ol.
Ol byltyr 20 jasqa deıingi jastar arasynda álem chempıony ataǵyn jeńip aldy. Odan buryn Tashkentte ótken Azııa chempıonatynda 2 mərte altyn medal oljalasa, Perýdiń Lıma qalasynda jasóspirimder arasyndaǵy Álem kýbogynyń jeńimpazy atanǵan.
«Qazir ata-anam meniń árbir jarysyma kóz tigip, eleńdep otyrady. Saıys aldynda maǵan qoldaý bildirip, erekshe jiger syılaıdy. Túrli dodalar barysynda men olardan shalǵaıǵa uzap ketsem de olardyń osyndaı jyly yqylas-peıiliniń arqasynda dál qasymda júrgendeı sezinemin. Otbasymda menen basqa sportshy joq», - deıdi Aısamal Sansyzbaeva.
Bala kezinen úlken jetistikterge qol jetkizýdi qalaıtyn ol sol jolda tynbaı ter tógip keledi. Árbir jattyǵýda bapkerler úıretken aqyl-keńesine uqypty túrde qulaq asady.
«Alda bizdi kóptegen jarystap kútip tur. Álem, Azııa jáne Qazaqstan birinshiligi bar. Olardyń árbirine erekshe daıyndyq kerek. Sonda ǵana jetistikke qol sozýǵa múmkindik týady. Qazir sol dodalarǵa daıyndyq bastalyp ketti», - deıdi aýyr atlet.
Ol jarys barysynda yrymdarǵa kóp sene bermeıtinin aıtady. Aldymen jaratýshy ıemizge syıynyp, sodan keıin jarysqa tas-túıin daıyndyqpen shyǵamyn.
«Shynymdy aıtsam, yrymdarǵa kóp sene bermeımin. Allaǵa syıynyp, joǵary jetistikke qol sozýdy qalaımyn. Alǵa qoıǵan maqsattarym kóp. Ázirge ony qupııa ustaı turaıyn. Aldymen bapkerler senimin aqtaýǵa kúsh salamyn. As-taǵamdardan etti, mantyny jáne táttilerdi jaqsy kóremin», - deıdi Aısamal bizben áńgimesinde.
