Aıryqsha mańyzdy metaldar qorlaryn basqarýdyń ulttyq júıesi jasalady — Úkimet
ASTANA. KAZINFORM — Prezıdent Joldaýyn iske asyrý aıasynda geologııalyq barlaý tásilderi ózgeredi. Bul týraly Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Jer qoınaýyn paıdalaný jáne ındýstrııalyq-tehnologııalyq damý salasynda aǵymdaǵy jyldyń sońyna deıin aıryqsha mańyzdy metaldar qorlaryn basqarýdyń ulttyq júıesi jasalady. 2027 jyly eldiń ındýstrııalyq-tehnologııalyq damýyn jedeldetý tetikterin engizý, sondaı-aq «Biryńǵaı jer qoınaýyn paıdalaný platformasy» aqparattyq júıesin tolyǵymen toltyrý arqyly geologııalyq derekterdiń ashyqtyǵyn qamtamasyz etý josparlanǵan, — dedi Serik Jumanǵarın.
Onyń aıtýynsha, geologııalyq barlaý tásilderi ózgeredi.
— Ozyq tehnologııalardy qoldanýǵa jáne tsıfrlyq geologııalyq kartalardy qalyptastyrýǵa basymdyq beriledi, — dedi mınıstr.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
