Aıryqsha mańyzdy metaldar qoryn tıimdi basqaratyn ulttyq júıe qurý qajet - Prezıdent
ASTANA. KAZINFORM – Elimizdiń ındýstrııalyq-tehnologııalyq turǵydan jedel damýyna qajetti tetikterdi ázirleý kerek. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
- Buǵan qosa, elimizdiń ındýstrııalyq-tehnologııalyq turǵydan jedel damýyna qajetti tetikterdi ázirleý kerek. Qazaqstan – mıneraldar men shıkizatqa baı memleket. Bul – biz úshin strategııalyq jetistik. Sondyqtan geologııalyq barlaý tásilderin túbegeıli ózgertý qajet. Jańa ken oryndaryn burynǵy zamannan qalǵan ádistermen izdeý oń nátıje bermeıtini anyq. Qazirgi tańda geologııany joǵary tehnologııalyq sala retinde moıyndaýymyz kerek, - dedi Memleket basshysy.
Prezıdenttiń atap ótýinshe, ozyq tehnologııalardyń kómegimen elimizdiń jer qoınaýyn tolyqqandy zerttep, derekterdiń ashyqtyǵyn jáne qoljetimdi bolýyn qamtamasyz etý óte mańyzdy. Jańa ken oryndaryn izdeý jáne barlaý úderisine jeke qarajatty belsendi tartqan jón.
- Bárińizge málim, qazir aıryqsha mańyzdy metaldardyń róli artyp keledi. Halyqaralyq tájirıbege súıene otyryp, bizge de osyndaı metaldardyń qoryn tıimdi basqaratyn ulttyq júıe qurý qajet. Atalǵan júıede taý-ken salasyndaǵy jobalardy uzaqmerzimdi qarjylandyrýǵa múmkindik beretin naqty tetikter bolýǵa tıis, - dedi Qasym-Jomart Toqaev.
Memleket basshysynyń paıymynsha, elimizde osy baǵytta jumys istep jatqan kásiporyndarmen offteık-kelisimshart jasaý arqyly kepildi suranysty qamtamasyz etken jón.
- Bul – Úkimettiń aldynda turǵan mańyzdy mindettiń biri. Osy máseleni kásipkerlermen birlese talqylap, jyl sońyna deıin maǵan naqty usynys engizý qajet, - dedi Prezıdent.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.