Aınur Tursynbaeva «ash qasqyrdaı jalańdaǵan jas urpaq ósip kele jatyr» dep kúıindi
ASTANA. QazAqpart - Aıtysker aqyn Aınur Tursynbaeva áleýmettik jelilerdegi «jatyp atarlardy» sabyrǵa shaqyrdy. Ol adamdardyń qatygez ári ashýshań bolyp bara jatqanyna alańdaýly.
«Osy shyndaryńyzdy aıtyńyzdarshy... Sizderdi osy qoǵamdaǵy qatygezdik qorqytpaı ma? Mysaly, osy Instagramnyń ózin alaıyqshy. Jap-jas kelinshekter, tıtteı qyzdar, barmaqtaı balalar zirkildep komment jazyp otyrady. Anasynan úlken ánshilerge «seni jek kórem», «daýysyń qursyn», «túriń jaman» dep ý shashyp otyrý qorqytady meni. Adamdy qaıtsem jylatam, qaıtsem kemsitem, qaıtsem renjitem dep ash qasqyrdaı jalańdaǵan jas urpaq ósip kele jatyr. Janym túrshigedi. Jamandyqty jazý arqyly siz óz jolyńyzdy jabasyz! Sizdiń bir aýyz sózińizge meniń túgim ketpeýi múmkin, biraq ol sizge mindetti túrde oralady... 100%! Meıirimdi bolyp úırenińiz. Tipti qatty jek kórip tursańyz da jyly komment jazyp úırenińizshi... Jolyńyz ashylady. Oqyǵan adam qýansa sizge de sondaı qýanysh keledi. Bul ómirdiń zańy!» - dep jazady Tursynbaeva áleýmettik jelidegi paraqshasynda.
Aqyn, bireýge jamandyq tileý adamnyń ózine aýrý akeletinin aıtady.
«Qatty janyńyz ashyp bara jatsa jekege jazyp kórińiz. Biraq Siz aıtty eken dep eshteńe ózgermeıtinin umytpańyz. Beker júıkeńiz quryp, keýdeńizge jaman energııa jınaısyz. Jaman energııa rakqa ushyratady... Kúıeýińizge, eneńizge, dosyńyzǵa degen renishti basqadan almańyz. Umytyńyz! Keshirip úırenińiz! Sonda jolyńyz ashyla beredi. Jolyńyz ashylsa baǵyńyz ashylady. Ashyq jarqyn bolyńyz. Árıne qıyn. Ózińizdi tárbıeleýdi ınstadan bastańyzshy. Kez kelgen fotonyń jaman jerine mán bermeı, kórseńiz de kórmegendeı ótip ketýge tyrysyńyzshy. Tipti unamasa oqymańyz, qaramańyz. Aıdaladaǵy adamǵa júıkeńizdi juqartpańyz. Ózińizdi qınap bolsa da qýanyp, súısinip úırenińizshi. Bul ómir ǵajap emes pe?! Durystap, asyqpaı, jan-jaǵyńyzǵa qarańyzshy. 2-3 mınýt kózińizdi jumyp, barlyq deneńizdi, mıyńyzdy bosatyp tereń tynys alyp, oılanyp kórińizshi. Bári jaqsy! Júregińizdi jumsartyńyz! Eń jaman adamnyń eń jaqsy jerin izdep taýyp kórińizshi. Mindetti túrde tabasyz, mindetti túrde jaqsy kórip ketesiz», - dep túıindegen sózin Aınur Tursynbaeva.
