Aınur Nurseıit túrkııalyq ushaqtaǵy tóbeles týraly: ákem balaly áıeldiń qylyǵyna shydaı almady
ALMATY. QazAqparat - Kásipker kelinshek Aınur Nurseıit Antalııa-Almaty ushaǵy bortynda bolǵan jaǵdaı týraly pikir bildirdi.
Atalǵan baǵyt boıynsha charterlik reısti oryndaǵan túrkııalyq áýekompanııa ushaǵy bortta bolǵan tóbeles kesirinen Aqtaýǵa qonýǵa májbúr bolǵan. Onyń aıtýynsha, ushaqta áıel balasymen otyrǵan. Onyń balasy jylap, eldiń mazasyn alady. Áıel ony jubatýǵa esh árekettenbegen.
«Ol áıel qasynda otyrǵan anasymen ursysa bastady. Sosyn bizderge aıqaılady. Arada daý shyqty. Meniń ákem bizderden bólek otyrǵan. Eń jaman jeri, ol iship (alkogol) alǵan bolatyn. Jalpy, ol -tabıǵatynda óte jýas adam. Onyń iship alǵanyn bilip, álgi kelinshek oǵan tıise bastady. Ákem onyń aıqaıyna shydaı almaı, qarsy shyqty. Osy kezde bir jas jigit ákemdi betinen uryp jiberdi. Tóbeles bastalyp ketti. Ákem úshinshi toptaǵy múgedek. Sondyqtan, ol janjaldan aýlaq júredi. Ol sportshy emes, sýretshi», - dedi A.Nurseıit.
Buǵan deıin habarlanǵandaı, Aqtaý halyqaralyq áýejaıyna 12 qyrkúıekke qaraǵan túngi saǵat 00:16-da ATLAS JET\ATLAS GLOBAL áýe kompanııasynyń K6755 charterlik reısi kelip qonǵan.
«200 jolaýshyny tasymaldap kele jatqan ushaq ekıpajy borttaǵy úsh jalaýshynyń kesirinen Aqtaý áýejaıyna qondy. Olar mas bolyp, qasyndaǵy adamdardy, bortserikterdi balaǵattaǵan», - delingen Kóliktegi ІІD habarlamasynda.
Anyqtalǵandaı, aıqaı shyǵarǵan úsh jolaýshy Almaty oblysynyń turǵyndary bolyp shyqty.
A. Nurseıittiń aıtýynsha, onyń ákesi oqıǵa kýágeri retinde ákimshilik iske tartylyp jatyr.
