Áınek jýǵysh suıyqtyqtan ýlaný qaýpi bar: mamandar júrgizýshilerge eskertý jasady
ASTANA. KAZINFORM — Avtokólikke arnalǵan áınek jýǵysh suıyqtyqty tańdaǵan kezde onyń qaýipsizdigine kóz jetkizý mańyzdy. Sebebi suıyqtyq densaýlyqqa qaýip tóndirýi múmkin. Bul týraly sanıtarııalyq-epıdemıologııalyq baqylaý komıteti habarlaıdy.
Avtokólik áınek jýǵysh suıyqtyǵy áınekterdiń tazalyǵyn qamtamasyz etip, joldaǵy kórinýdi jaqsartady. Bul ásirese qys mezgilinde mańyzdy. Alaıda sapasyz ónimdi paıdalaný júrgizýshilerdiń densaýlyǵy men qaýipsizdigine eleýli qaýip tóndirýi múmkin.
Komıtet josyqsyz óndirýshiler áınek jýǵysh suıyqtyqtardyń quramynda júıke júıesi men kórý organdaryna ýytty áser etetin kúshti ýly zat — metıl spırtin (metanoldy) paıdalanýy múmkin ekenine nazar aýdarady.
— Suıyqtyqty paıdalaný kezinde metanol býlary avtokóliktiń jeldetý júıesi arqyly salonǵa enýi múmkin. Olardy tynys alý bas aýrýyn, bas aınalýdy, júrek aınýyn, kórý qabiletiniń buzylýyn, al joǵary kontsentratsııada aýyr ýlanýdy týdyrýy yqtımal, — dep eskertti mamandar.
Áınek jýǵysh suıyqtyqtarǵa qoıylatyn talaptar Keden odaǵy Komıssııasynyń 2010 jylǵy 28 mamyrdaǵy № 299 sheshimimen bekitilgen, sanıtarııalyq-epıdemıologııalyq qadaǵalaýǵa (baqylaýǵa) jatatyn ónimderge qoıylatyn biryńǵaı sanıtarııalyq-epıdemıologııalyq jáne gıgıenalyq talaptardyń 5-bóliminde belgilengen.
— Ónimniń qaptamasynda memlekettik jáne orys tilderinde tańbalanýy tıis. Onda ónimniń ataýy, óndirýshi týraly málimetter, óndirilgen kúni, saqtaý merzimi men sharttary, maqsaty jáne partııa nómiri kórsetilýi qajet. Ónimniń qaýipsizdigin rastaıtyn qujat — memlekettik tirkeý týraly kýálik (MTK). Onyń bar-joǵyn EAEO memlekettik tirkeý týraly kýálikteriniń biryńǵaı tiziliminen tekserýge bolady, — deıdi olar.
Komıtet tutynýshylarǵa áınek jýǵysh suıyqtyqtardy tek belgilengen saýda oryndarynan satyp alýdy, ónimniń tańbalanýyna jáne qaýipsizdigin rastaıtyn qujattarynyń bolýyna nazar aýdarýdy usynady. Mundaı qujattary joq saýda oryndarynan ónim satyp alýdan bas tartqan jón.
Aıta keteıik, joldaǵy qaýipsizdik tek avtokóliktiń tehnıkalyq jaramdylyǵyna ǵana emes, sonymen qatar paıdalanylatyn ónimderdiń sapasyna da baılanysty.
Osyǵan deıin qysqy shına tańdaýda osy 5 nárseni eskerý qajet ekenin jazǵanbyz.
