Aınaúl Mýsına: Karantındik sharalardy saqtaý – derttiń ýshyǵyp ketpeýine kómegin tıgizedi

KÓKShETAÝ. QazAqparat - Karantındik sharalardy saqtaý – oblystaǵy epıdemıologııalyq jaǵdaıdyń ýshyǵyp ketpeýine kómegin tıgizedi. Bul týraly oblystyń bas sanıtarlyq dárigeri Aınagúl Mýsına óńirlik kommýnıkatsııalar qyzmetinde ótken brıfıngte málimdedi, dep habarlaıdy QazAqparat tilshisi oblystyq ishki saıasat basqarmasyna silteme jasap.

Óńirdiń bas sanıtarlyq dárigeriniń aıtýyna qaraǵanda, koronavırýs ınfektsııasynyń taralýy boıynsha Aqmola oblysy osymen ekinshi kún qatarynan «qyzyl aımaqta» tur. Epıdemıologııalyq jaǵdaı kúrdelenip barady. Sońǵy aptadaǵy indettiń ósim kórsetkishi, aldyńǵy aptaǵa qaraǵanda 1,5 esege deıin ulǵaıǵan.

«Óńirdegi epıdemıologııalyq jaǵdaı óte qıyn deýge bolady. Sebebi, bir kúnde 75 jaǵdaı tirkelip, onyń 42-si Kókshetaý qalasynda anyqtalǵan. Oblysta indeti taraı bastaǵaly 4700-ge jýyq adamnan koronavırýs zerthanalyq tásilmen rastaldy. Qazirgi ýaqytta oblys statsıonarlarynda 209 naýqas osy dertten emdelip jatyr. Ókinishke oraı, 83 adam osy indettiń qurbany bolǵan. Bul jaǵdaılar boıynsha tıisti sharalar qoldanylýda. Halyq sanıtarlyq-epıdemıologııalyq qyzmet tarapynan usynylatyn talaptarǵa túsinistikpen qarap, olardy oryndaýlary qajet. Karantındik sharalardy saqtaý – oblystaǵy epıdemıologııalyq jaǵdaıdyń ýshyǵyp ketpeýine kómegin tıgizedi», - dedi A.Mýsına.

Aıta keteıik, Aqmola oblysynda koronavırýs ınfektsııasyn juqtyrý boıynsha sońǵy táýlikte 75 jaǵdaı tirkelse, onyń 42-si Kókshetaý, 9-y Stepnogor qalalary úlesinde. Al, qalǵandary Atbasar, Býrabaı, Zerendi, Bulandy jáne Sandyqtaý aýdandarynda tirkelip otyr.