Aınalma jolǵa kirgende kólik júrgizýshileri qaı jaq burylys shamyn jaǵýy tıis

ÓSKEMEN. KAZINFORM — Polıtsııa kólik júrgizýshileri aınalma jolǵa kirgende zań boıynsha qaı jaq burylys shamyn jaqqany durys bolatyndyǵyn túsindirip berdi.

Óskemende bir emes, birneshe aınalma jol bar. Sonyń ishindegi Ertis kópirine túsiretin aınalma jolda jol-kólik oqıǵasy jıi bolady.

Júrgizýshilerdiń kóbi osyndaı jolǵa túskende qaı jaq burylys shamyn jaǵý qajettigin bilmeı, shatasyp jatady. Biri oń jaq, basqalary sol jaq burylys shamyn jaǵady. ıAǵnı, birizdilik joq. Al bul joldaǵy apatty jaǵdaılar sanyn arttyratyndyǵy belgili.

Osy rette, Kazinform tilshisi ShQO Polıtsııa departamentine saýalhat jiberip, bul saýaldyń jaýabyn bilip kórdi.

— Jol qozǵalysy erejelerine sáıkes, aınalmaly qozǵalyspen qıylysqa kirgen kezde jáne shyqqanda júrgizýshi oń jaq burylys shamyn jaǵýy kerek, — dep jaýap berdi departamenttiń baspasóz qyzmetinen.

Demek, júrgizýshiler aınalma jolǵa kirgende oń jaq burylys shamyn jaǵýy tıis. Odan soń aınalma jol ishinde júrgende sol jaq shamdy, aınalma joldan shyqqanda qaıtadan oń jaq shamdy jaǵýy kerek.

Eske salsaq, osyǵan deıin polıtseılerdiń bireýdiń jekemenshik kóligin paıdalanýǵa qaqysy bar-joqtyǵy týraly jazǵanbyz.