«Aımaýytovqa eskertkish ornatylady» - baspasózge sholý
«Egemen Qazaqstan» gazetiniń jazýynsha, Qazaqstan Respýblıkasynyń Prezıdenti Nursultan Nazarbaev Munaı jáne gaz mınıstri Uzaqbaı Qarabalındi qabyldady. Memleket basshysyna U.Qarabalın mınıstrliktiń 2013 jylǵy qyzmetiniń qorytyndylary, qazirgi kezeńdegi josparlar jáne saladaǵy Prezıdenttiń Qazaqstan halqyna Joldaýynan týyndaıtyn strategııalyq mindetter týraly baıandady. N. Nazarbaev ınvestıtsııa tartýdyń jáne salany ınnovatsııalyq damytý jónindegi jumysty kúsheıtýdiń mańyzdylyǵyn atap ótti, sondaı-aq, iri munaı-gaz ken oryndary men nysandarynyń tóńireginen óndiristik klasterler qurý qajettigine erekshe nazar aýdardy. Kezdesý barysynda mınıstr Memleket basshysyna Qazaq munaı jáne gaz ınstıtýtynyń jetekshiligimen ǵylymı-zertteý uıymdary toby ázirlegen Qazaqstannyń perspektıvalyq munaı-gazy bar basseınderi atlasyn tanystyrdy. Atlas óńirlik geologııalyq barlaýda odan ári perspektıvalyq jumystardy qarastyrýǵa múmkindik beredi. Buǵan qosa, mınıstr Qazaqstannyń 15 shógindi alabyna keshendi zertteýler júrgizý jónindegi jumys qorytyndylary, sondaı-aq, elimizde otandyq geologııalyq barlaýdyń perspektıvalary men munaı-servıstik klasterlerin qalyptastyrý týraly baıandady. Bul týraly «Birqatar naqty tapsyrmalar berdi» degen maqalada berilgen.
Bas basylymda «Aman, Esen, Júrsin!» atty materıal jarııalandy. Tarazdaǵy №1 qalalyq balalar aýrýhanasynyń perzenthana bóliminde qala turǵyny Aınur Kóshpenbetova esimdi jas ana dúnıege úshem ákeldi. Olardyń árqaısysynyń salmaǵy 2,5 keliden. Aınur aıaǵy aýyr kezde oblystyq densaýlyq saqtaý basqarmasynyń joldamasymen Almaty qalasynyń akýsherlik-gınekologııalyq ınstıtýtynda aldyn alý tekserýlerinen ótip, júkti áıelderde bolatyn asqynýlardan emdelgen. Sondaı-aq, Taraz qalasyndaǵy №4 qalalyq emhanasynda esepke turyp, turaqty túrde dárigerlerdiń baqylaýynda bolǵan.Aınur Kóshpenbetova men onyń jubaıy Qanat Orynbekovtiń buǵan deıin 3 balasy bar bolatyn. Endi, mine, olardyń qataryna Aman, Esen jáne Júrsin esimdi baýyrlary qosylyp, jas jubaılar birden kópbalaly otbasyna aınaldy. Aınur ázirge jumys istemeıdi, al kúıeýi kólik júrgizýshi bolyp eńbek etip júr. Dárigerlerdiń aıtýynsha, balalar qajetti salmaǵyn qosyp, tıisti qalpyna kelgenshe medıtsına qyzmetkerleriniń baqylaýynda bolady.
Oblysta ótken jyly jalpy 27 028 bala, onyń ishinde 13 106 ul, 13 922 qyz ómirge kelipti. Sonyń ishinde 3 otbasy úshem qýanyshyna bólengen. Búginde olardyń barlyǵy saý-salamat ósip keledi.
***
«Aq tútek boran qysqan kúnderi qazaqstandyqtar tótenshe jaǵdaı organdarynan eskertý jazylǵan «sms» hat alyp jatady. Keıbir adamdarǵa eskertý «es-em-esi» sottardan da kelýi múmkin eken»,-dep jazady «Aıqyn» gazeti búgingi sanyndaǵy «Zań jobasy talqylandy» degen maqalasynda. Qazaqstanda ákimshilik qylmystar boıynsha sot isine qatysýshylardy sot bolatyn ýaqyt týraly «sms»-pen habardar etý kózdelipti. Tıisti bap tipti qoldanystaǵy Ákimshilik quqyq buzýshylyq týraly kodekste qarastyrylǵan kórinedi. Alaıda depýtattar ony aýystyratyn jańa Kodekste osy bapty ózgertýdi usynýda. Keshe Májilistegi jumys tobynda depýtattar jańa jobany Úkimet ókilderimen jáne Bas prokýratýramen birge talqyǵa saldy. Qoldanystaǵy Ákimshilik quqyq buzýshylyq týraly kodekstiń 730-babynda ákimshilik quqyq buzýshylyq týraly iske qatysýshylardyń «isti qaraý merzimi men orny nemese olardyń is júrgizý áreketterin jasaǵany týraly» habardar etiletindigi aıtylǵan.
Osy basylamda «Ǵylym deńgeıi artady» degen maqala berilgen. Elbasynyń «Qazaqstandyq jol - 2050: bir maqsat, bir múdde, bir bolashaq» Joldaýyn júzege asyrý isine «Qazaqstan-2050» jalpyulttyq qozǵalysy belsendi aralasady.
Ortalyq kommýnıkatsııalar qyzmetindegi brıfıngte osy qozǵalystyń ókilderi Prezıdenttiń jańa Joldaýy aıasyndaǵy ózderiniń mindetteri týraly aıtyp berdi. Bul birlestikti azamattardyń bastamashyl toby 2013 jyldyń 6 jeltoqsanynda qurǵan bolatyn. Jetekshisiniń aıtýynsha, bul - «Qazaqstanǵa senetin, óz bolashaǵyn sonymen baılanystyratyn jáne eldi damytýǵa shaǵyn bolsa da, úles qosýǵa daıyn adamdardyń qozǵalysy».
-Qozǵalystyń mıssııasy retinde biz «Qazaqstan - 2050» Strategııasynda jarııalanǵan Elbasynyń jańa saıası baǵytyn qoldaý jolymen, Qazaqstandy álemdegi eń damyǵan 30 eldiń qataryna kirgizýdi belgiledik,-dedi «Qazaqstan-2050» jalpyulttyq qozǵalystyń tóraǵasy Danat Jumın. - Biz úshin búginde elimizde turyp jatqan adamdardyń neǵurlym kóp bóliginiń Strategııada ne týraly aıtylatyndyǵyn túsingeni, ony júzege asyrýǵa óziniń qatysýynyń mańyzdylyǵyn túısingeni óte mańyzdy. Qazaqstandyqtar HHІ ǵasyr ortasyna deıingi bul Strategııanyń Astanada, Úkimet qabyldaı salǵan qandaı da bir kezekti qujat emestigin uǵynsa deımiz, - degen ol «Qazaqstan - 2050»-diń qazaq jerinde ómir súretin barlyq adamdardyń bolashaǵyn «kóp jyldarǵa oza anyqtaıtynyn» nyqtady.
***
«Gazetimizdiń 14 qańtar, seısenbi kúngi sanynda «Aımaýytovtyń jazyǵy ne?» degen maqala jarııalanǵan bolatyn. Onda oblys ortalyǵynda ornatylatyn Alashtyń ardaqtysy Júsipbek Aımaýytovqa arnalǵan quny 60 mıllıon teńge turatyn eskertkishtiń oblystyq máslıhattyń sheshimimen basymdyǵy joq shyǵyndar qataryna jatqyzylyp, qysqaryp qalǵany aıtylǵandy. Jurtshylyq, qazaq qaýymy kútip júrgen eskertkish Júsibek Aımaýytov atyndaǵy oblystaǵy mýzykalyq-drama teatrynyń aldynan oryn alýy tıisti. Olaı bolsa, Aımaýytovqa kelgende bılik basyndaǵylardyń únemshil bola qalǵany qalaı?! Aımaýytovtyń jazyǵy ne? Aımaýytov qazaq úshin qymbat. Oblystyq máslıhattaǵylar osyny oılady ma eken?! - degen edik»,-dep jazady «Egemen Qazaqstan» basylymy «Aımaýytovqa eskertkish ornatylady» degen materıalynda. Endi, mine, oblys ákimi Qanat Bozymbaevtyń baspasóz qyzmetinen jaýap ta kelip úlgerdi. Onda bylaı delinipti: «Oblys ákimdigi qazaqtyń birtýar uly, jazýshy, dramatýrg, aýdarmashy, Alash qaıratkeri Júsipbek Aımaýytovqa eskertkish qoıý týraly oblystyq máslıhattyń shyǵarǵan sheshimin múldem joıǵan joq. Eskertkishke qatysty ázirlengen joba qaıta qaralyp, sheshim qabyldanady. Sondaı-aq, eskertkishke arnalǵan qarajatty jergilikti bıýdjetten nemese basqa qarajat kózderinen bólý máselesi de tıisti sheshimin tabatyn bolady». Bárekeldi!
