Aımaýytov teatry 36-shy maýsymyn «Jas Abaı» tragedııasymen ashty
PAVLODAR. KAZINFORM -Aımaýytov teatrynda 36-shy maýsym ashyldy. Ujym jańa maýsymdy Abaı Qunanbaıulynyń 180 jyldyǵyna oraılastyryp, Muhtar Áýezovtiń «Erte oıandym, oılandym… Jas Abaı» qoıylymymen bastap ketti.
«Erte oıandym, oılandym… Jas Abaı» tragedııasy — uly aqyn Abaı Qunanbaıulynyń rýhanı oıanysy men halqynyń qamyn jegen tereń oılaryn beıneleıtin teatrlyq qoıylym. Bul spektaklde jas Abaıdyń júregin mazalaǵan suraqtar, el ishindegi nadandyq pen jalqaýlyqqa qarsy ishki kúresi, ádilet pen bilim jolyndaǵy izdenisi kórkem sahnalyq obrazdar arqyly óriledi.
Qoıýshy rejısseri — Ádilet Aqanov.
Teatrdyń kórkemdik jetekshisi Ádilet Aqanovtyń aıtýynsha, jańa maýsymda teatr ujymy eki birdeı halyqaralyq teatrlar festıvaline shaqyrtý alyp otyr. Onyń biri 12-17 qyrkúıek kúnderi Jezqazǵan qalasynda ótetin Janat Hadjıev atyndaǵy VI halyqaralyq teatr festıvali bolsa, ekinshisi — 23-27 qyrkúıek kúnderi Aqtóbede ótetin Q.Shańǵytbaevtyń 100 jyldyǵyna arnalǵan VIІ halyqaralyq «Balausa» eksperımentaldi spektaklder festıvali.
Al aldaǵy maýsymda akterler óz kórermenderin 4 jańa premeramen qýantýdy uıǵarǵan. Onyń biri — Murat Qolǵanattyń «Muǵalim» qoıylymy. Áleýmettik drama búgingi qoǵamdaǵy ustazdardyń róli men mártebesi týraly máseleni kóteredi.
Eske sala keteıik, Qazaqstandaǵy teatrlardyń 79,7%-y memleket menshiginde.