«Aıman-Sholpan» mýzykalyq komedııasynyń jańa qoıylymynda qazirgi zamannyń beıneleri somdalady
ASTANA. 15 qarasha. QazAqparat /Rýslan Ǵabbasov/ - 18 qarashada Q.Qýanyshbaev atyndaǵy qazaq mýzykalyq drama teatrynda «Aıman-Sholpannyń» jańa qoıylymynyń tusaýkeseri ótedi.
Ázilmen árlengen bul mýzykalyq komedııanyń basty ereksheligi - zamannyń úrdisine oraılastyrylyp, jańartylǵan. Shyǵarmanyń mazmuny ózgertilmeı, tek ony sahnalaý tásili tolyqtyrylǵan. «Bul qoıylymnyń keıipkerleri jańa zamannyń beınelerin somdaıdy. Atap aıtsaq, M.Áýezovtyń klassıkalyq keıipkerleri - Aıman men Sholpan búgingi zamanǵy «olıgarhtyń» erke qyzdaryna, Álibek zııaly qaýym ókiline, Arystan men Kótibar «jańa qazaq» beınesine aınalmaq. Qoıylym ádettegideı án men bıge toly bolǵanymen, onyń kórermenge jetkizý tásili zamannyń tynysyna oraılastyrylyp, ózgertilgen»,- deıdi atalǵan qoıylymǵa qatysýshylar.
M.Áýezov halyq aýyz ádebıetinde qazaq qyzy Aımannyń beınesi arqyly izet-ınabatty, keń peıildilikti, tapqyrlyqty, kúsh-qaıratty sýrettegen edi. Sondaı-aq kórermen burynǵy qoıylymdardan oqıǵa jelisimen qatar, qazaq halqynyń salt-dástúrine kórip, klassıkalyq áýenderin tyńdaǵan bolatyn. Al bul qoıylymda kórermender aıtystyń, bıdiń búgingi ózgergen stılin tamashalaı alady. Atap aıtqanda qoıylymdaǵy ánder jańadan jazylǵan, onyń kompozıtory - Qaırat Toqymbetov, qoıýshy rejısseri - QR Eńbek sińirgen qaıratkeri Álimbek Orazbekov.
