Aıman Omarova: Koronavırýs quqyqtyq nıgılızm problemasynyń betin ashyp berdi
«Men óz jumysymda qazaq tildi ortaǵa kóp nazar aýdarǵym keledi. Álbette, men ol ortadan shettegim kelmeıdi. Biraq aqparattyq alańda orys tilinde málimet, aqparat tym kóp bolsa, qazaq tilinde ondaı múmkindik mol dep aıta almaımyz. Aýyldaǵy azamattarmen til tabysý óte qıyn. Jalpy quqyqtyq saýatqa qatty áser etetin faktordyń biri – kompıýterlik saýat ekenine kózim jetti. Tsıfrlandyrýmen birge halyqty kompıýter tilin meńgerýge úıretý kerek. Keıde bul turǵyda jumysymdy qalaı jalǵastyramyn dep oılaımyn. Keı azamattarmen sóılesip otyryp, olar menen «feısbýk degen ne?» dep suraǵan kezde ne dep jaýap bererimdi bilmeı qalamyn. Amal joq, keshke otyryp, telefonmen bárin túsindirýge týra keledi», - deıdi Aıman Omarova «Antikor LIVE» jobasynda.
Advokat qazir qoǵamda koronavırýs kóp máseleniń betin ashyp jatyr degen pikirge qatysty oıyn qosty.
«Bizdiń jaǵdaıda koronavırýs quqyqtyq nıgılızm problemasynyń betin ashyp berdi. Adamdardyń bári de problema joq kezde bári óz qalpynda tura berýi kerek oılaıtyn sekildi. Olaı emes. Adamdar óz quqyǵyn bala kezden bilýi tıis. Azamattar óz quqyǵyn bala kezden bilse – quqyqbuzýshylyq az bolady, ekinshiden olar basyna is túsken kezde qaıda barý kerektigin biledi. Aýyldaǵy azamattar qaıda bararyn bilmeıdi. Bilmegennen keıin problema týyndaı beredi. Birneshe aı buryn maǵan túnniń bir ýaǵynda bir áıel qońyraý shalyp «álgi burynǵy kúıeýim alıment tólemeıdi, ólemin» deıdi. Amal joq, ondaıda psıholog bolyp ketemiz», - deıdi Aıman Omarova.
