Aıman Omarova «Halyq úni» jobasy qamtyǵan sharalar týraly aıtty
NUR-SULTAN. QazAqparat - Quqyq qorǵaýshy Aıman Omarova «Halyq úni» áleýmettik jobasynyń bastalýyna oraı túsinik berdi, dep habarlaıdy QazAqparat tilshisi.
«Qazirgi «Halyq úni» jobamyz Prezıdent tujyrymdamasyn negizge alyp otyr. Osy joba aıasynda el halqy tıisti máselelerdi jetkizip, ońtaıly tájirıbesimen de bólise alady. Munyń barlyǵy «Halyq únine qulaq asatyn memleket» tujyrymdamasy laıyqty deńgeıde iske asýy úshin qajet bolyp tur», - dedi A. Omarova Antikor alańyndaǵy onlaın baspasóz máslıhatynda.
«Halyq úni» jobasy barysynda alǵa negizgi alty mindet qoıylyp otyr. Olar:
1. Bılik pen buqaranyń arasyndaǵy baılanysty nyǵaıtý;
2. Memlekettik qyzmetterdi, áleýmettik tólemderdi alý sharttaryn turǵyndarǵa keńinen túsindirý;
3. Áleýmettiń ál-aýqatyn arttyrý maqsatynda júzege asyp jatqan memlekettik saıasatty jan-jaqty túsindirý, memlekettik baǵdarlamalarǵa qatysý belsendiligin arttyrý;
4. Shalǵaı aımaqtardaǵy turǵyndardy aqparattandyrý salasyn jetildirý;
5. Halyq arasynda túrli áleýmettik máselelerdi taldap-tarazylap, monıtorıng jasaý;
6. Memlekettik organdardyń jumysynyń durystyǵyn qamtamasyz etý arqyly halyqpen udaıy keri baılanys ornatý.
«Joba aıasynda Abaı aýdanyna saparlaǵan kezde turǵyndar tarapynan túrli máseleler kóterildi. Bul jobaǵa QR Sybaılas jemqorlyqqa qarsy qyzmeti de qatysqany tıimdi bolatynyn túsinip otyrmyz. Osy oraıda agenttik ókilderine, «Altyn Qyran», «Human Rights Lawyers» qorlaryna alǵysymdy aıtqym keledi. Olar alǵashqy saparymyz barysynda óziniń eleýli úlesin qosyp úlgerdi. Atalǵan aýdanda kitaphana, ınternet máselesi, mektepterde aǵylshyn tilin oqytý, turǵyndardyń densaýlyǵy problemalary zerdelendi. Bul turǵyda problemalardy eskerip, hattama daıarlap, ony Prezıdent Ákimshiligine joldadyq», - dedi Aıman Omarova.
Budan buryn habarlanǵandaı, qarasha aıynyń basynda Aıman Omarova «Halyq úni» jobasy bastaý alǵan Shyǵys Qazaqstan oblysyndaǵy Abaı aýdany halqynyń problemalaryn atady.
Aqparat jáne qoǵamdyq damý mınıstrliginiń tikeleı qoldaýymen QR Prezıdentiniń janyndaǵy Ulttyq qoǵamdyq senim keńesiniń múshesi, quqyq qorǵaýshy Aıman Omarovanyń bastamasymen jáne «Altyn Qyran», «Human Rights Lawyers» qorlarymen áriptestikte «Halyq úni» áleýmettik jobasy qolǵa alynǵan.
