Aıman Musaqojaevanyń kontserti Shanhaıdaǵy zaldy lyq toltyrdy
BEIJІŃ-ShANHAI. QazAqparat - Búgin Qazaqstannyń Halyq ártisi, Qazaq Ulttyq óner ýnıversıtetiniń rektory Aıman Musaqojaeva Shanhaı fılarmonııasynyń shaqyrtýymen Shanhaıda kontsert berdi, dep habarlady «QazAqparat» HAA tilshisi.
Sharanyń uıymdastyrylýyna «Rýhanı jańǵyrý» baǵdarlamasyna saı QR Mádenıet jáne sport mınıstrligi, QR-nyń Shanhaıdaǵy Bas konsýldyǵy qoldaý kórsetti.
Shanhaı fılarmonııasy orkestiriniń akkomponentindegi «Cadillac Shanghai Concert Hall»-daǵy A.Musaqojaevanyń óneri qytaılyq kórermenniń zor yqylasyna ıe boldy. Otandasymyzdyń oryndaý sheberligine qytaılyq tyńdarmandar tánti boldy.
A.Musaqojaeva P.I.Chaıkovskııdiń kúrdeli skrıpkalyq týyndysyn oryndady. Otandasymyzdyń ónerin emotsıonaldyq qarqyn, mýzykalyq týyndynyń kúrdeli mánerin bere bilýi erekshelendire túsedi. Aıman Musaqojaeva E.G. Brýsılovskııdiń «Bozaıǵyryn» oryndap, kópshiliktiń qurmet-qoshemetine bólendi.
«Biz osyndaı sharalardy kóptep ótkizemiz. Biraq bul jolǵysy joǵarǵy sheberligimen, P.I.Chaıkovskııdiń klassıkalyq mýzykasynyń tartymdylyǵymen kóptiń esinde qalary daýsyz. Shanhaı fılarmonııasynyń basshylyǵy birlesken mádenı sharalardy uıymdastyrý boıynsha yntymaqtastyqty ary qaraı damytýǵa múddeli», - dedi Shanhaı fılarmonııasy departamentiniń dırektory Pan In.
Kontserttiń bıletteri bir apta buryn tolyǵymen satylyp ketken eken. Kontserte qyzyǵýshylyq zor bolǵandyqtan, uıymdastyrýshylar kórermender úshin qosymsha oryn ázirlegen.
Konertke deıin Aıman Musaqojaeva Shanhaı mýzykalyq konservatorııasynyń (Shanghai conservatory of music) rektory Lın Tszaııýnmen kezdesken. 2018 jyldyń qarasha aıynda Aıman Musaqojaeva men QazUÓÝ stýdentteriniń kontsertin ótkizý boıynsha aldyn ala kelisim jasaýǵa qol jetkizildi.
