Aıman Musaqojaevanyń álemdi moıyndatqan shákirtteri Astanada bas qosty
ASTANA. QazAqparat - Elordadaǵy «Qazaqstan» ortalyq kontsert zalynda Qazaq ulttyq óner ýnıversıtetiniń 20 jyldyǵyna oraı «Aıman Musaqojaeva usynady» atty kontsert bolyp ótti, dep habarlaıdy «QazAqparat» HAA tilshisi.
«Qazaqkontsert» memlekettik uıymynyń «Solıster Akademııasy» memlekettik orkestriniń súıemeldeýimen bir kezderi ýnıversıtetti bitirip ketken túlekter búgingi keshte bar ónerin saldy. Oǵan sebep te joq emes. Búgin de álemdi moıyndatqan ónerpazdarǵa aınalǵan skrıpkashylar irgeli ýnıversıtettiń 20 jyldyǵyna osylaı qurmetin kórsetip otyr.
Kontsertke AQSh-tan arnaıy tanymal dırıjer Edýard Shmıdder shaqyrylǵan. Odan bólek ýnıversıtettiń túlekteri Oralbek Dúısen, Aısha Dosymova, Eldar Saparaev, Pavel Romanenko, Madına Kapeý, Anel Shákirova, Anna Meşerıakova, Sergeı Vasılev syndy shetelde Qazaqstannyń ónerin tanytyp júrgen ónerpazdar jeke týyndylardy oryndap, kópshiliktiń qoshemetine ıe boldy.
«Búgin Qazaq ulttyq óner ýnıversıtetiniń 20 jyldyǵyna arnalǵan kontsertterdiń alǵashqy serııasyn ótkizip jatyrmyz. Osy kontsertte bizdiń ýnıversıtettiń qabyrǵasynan túlep ushqan shákirtterimiz, juldyzdarymyz óner kórsetýde. Shákirtterimiz álemniń barlyq elderinen arnaıy at terletip keldi. Álbette, osynaý sharany uıymdastyrýǵa qoldaý bildirip otyrǵan elimizdiń Prezıdentine zor alǵysymyzdy aıtqym keledi. 20 jyldyń ishinde bizdiń oqý orny - el mádenıetiniń beınesine aınaldy dese de bolady. Jyl boıy ýnıversıtetimizdiń jetken belesterin kórsetýge barymyzdy salamyz», - deıdi áıgili skrıpkashy, Qazaqstannyń Eńbek eri, atalǵan ýnıversıtettiń rektory Aıman Musaqojaeva.
Qazaq ulttyq óner ýnıversıtetiniń atalǵan shákirtteri búkil álemde gastroldik saparǵa jıi shyǵatyn ónerpazdar. Máselen, Ordabek Dúısen men Aısha Dosymova syndy skrıpkashylar eki myńynshy jyldardyń basynda AQSh kóship, sodan beri ónerin túletý ústinde.
Eki bólimge sozylǵan kontsertte Chaıkovskıı men Vıvaldıdiń, Motsart pen Pıatsollanyń týyndylary oryndaldy. Saz áýenniń sıqyryna tereń boılatqan skrıpkashylar men vıolonchel, fortepıao sheberleri uzaqqa sozylǵan qoshemetpen halyqtyń qurmetine ıe boldy.
Foto: mfa.gov.kz
