Aıman Musaqojaeva Djon Malkovıchtiń kelý qurmetine Stradıvarı skrıpkasymen ónerin pash etti
ASTANA. QazAqparat - Qazaqstannyń halyq ártisi, «Eýrazııa» halyqaralyq kınofestıvaliniń prezıdenti Aıman Musaqojaeva Gollıvýd akteri Djon Malkovıchtiń Qazaqstanǵa kelý qurmetine oraı Stradıvarı skrıpkasymen óner kórsetti, dep habarlaıdy «QazAqparat» HAA tilshisi.
«Oskar» syılyǵynyń eki dúrkin nomınanty, akter, rejısser Djon Malkovıch búgin Qazaq ulttyq óner ýnıversıtetinde BAQ ókilderimen baspasóz máslıhatyn ótkizdi. Máslıhat aldynda akter úshin JOO ónerpazdary shaǵyn kontsert uıymdastyrdy. Shara barysynda ýnıversıtet rektory Aıman Musaqojaeva orkestrmen birge eki ǵasyrlyq tarıhy bar Stradıvarı skrıpkasymen Pablo de Sarasateniń «Navarra» men Frıts Kreıslerdiń kompozıtsııalaryn oryndady.
Akterdiń kelý qurmetine sondaı-aq, «Shabyt» kúıshileriniń ansambli «Saryarqa» kúıin shashý etti.
Eske sala ketsek, tanymal akter Djon Malkovıch Qazaqstanǵa osymen ekinshi ret kelip otyr. Birneshe jyl buryn ol Almatydaǵy Qazaqstan-Amerıka birlesken kınofestıvaline qatysqan bolatyn. Osy joly belgili akter Astanada ótip jatqan HІІІ «Eýrazııa» halyqaralyq festıvaline arnaıy keldi.
