Aıman Musaqojaeva bastaǵan qazaq ártisteri Beıjiń jurtshylyǵyn tánti etti
Mádenı sharany Qytaı mádenıet mınıstrliginiń qoldaýymen Qazaqstannyń QHR-daǵy Elshiligi uıymdastyrdy. Beıjiń kontsert zalyna qazaq ártisteriniń ónerin tamashalaý úshin halyqaralyq uıymdardyń, QHR-da akkredıttelgen dıplomatııalyq ókildikterdiń, qytaıdyń iri korporatsııalarynyń basshylary, sheteldik jáne qazaqstandyq dıplomattar, olardyń otbasy músheleri, stýdentter, qazaq dıasporasynyń ókilderi, Qytaıdyń ǵylym jáne shyǵarmashylyq zııalylary jınaldy.
Merekelik kesh Qazaqstannyń QHR-daǵy Tótenshe jáne Ókiletti Elshisi Shahrat Nuryshevtiń, QHR Mádenıet mınıstrligi Halyqaralyq yntymaqtastyq departamentiniń dırektory Se Tszınpınniń quttyqtaý sózimen ashyldy. Kesh bastan-aıaq dırıjer Tao Fannyń jetekshilik etýindegi Qytaı Ulttyq radıo jáne televıdenıe sıfonııalyq orkestri qazaqstandyq ánshiler men skrıpkashylarǵa mýzykalyq demeý jasady.
Kóptegen halyqaralyq konkýrstardyń laýreaty, barıton Azat Málik, tanymal qazaqstandyq opera ánshisi Maıra Muhamedqyzynyń salǵan ánderi tyńdarmandardyń kóńilinen shyqty. Al Singer-2017 baıqaýynyń aqtyq synyna deıin jetken Dımash Qudaıbergenniń sahnaǵa shyǵýy zaldaǵy barlyq kórermendi shattyqqa bóledi. Ol «Adagio» jáne «Osennıaıa pechal» ánderin oryndady.
Qazaqstannyń halyq ártisi Qazaq ulttyq óner ýnıversıtetiniń rektory Aıman Musaqojaevanyń «Aıgólek» skrıpkashylar ansamblimen birge P.Chaıkovskııdiń, F.Kreıslerdiń jáne Pavlo Sarasateniń týyndylaryn oryndaýy kesh qonaqtarynyń zor tańdanysyn týdyrdy.
Kontsert aıaqtalǵannan keıin Qazaqstannyń QHR-daǵy Elshisi Sh.Nuryshev ártisterge rızashylyǵyn bildirse, kórermender uzaq ýaqyt qoshemet kórsetip, mýzykanttarǵa gúl shoqtaryn syıǵa usyndy.
«Bizdiń bul kontsertimiz eki memleket basshylarynyń - Qazaqstan Prezıdenti Nursultan Nazarbaevtyń «Nurly jol» jańa ekonomıkalyq saıasaty men QHR Tóraǵasy Sı Tszınpınniń «Jibek joly ekonomıkalyq beldeýi» bastamasyn ushtastyrý desek bolady. Bul kesh Qazaqstan men Qytaı halyqaralyq arasyndaǵy dostyqty pash etedi», - dedi QazAqparat tilshisine suhbat bergen A.Musaqojaeva.
