Aıman Qojahmetova úlken sportqa oraldy
ASTANA. QazAqparat - Sporttyq júristen London Olımpıadasynyń qatysýshysy, egizdiń syńary Aıman Qojahmetova birneshe jyl sporttan qalys qalǵan bolatyn. 30 naýryzda Shymkentte ótken qysqy Qazaqstan chempıonatynda sáýir aıynda 27 jasqa tolatyn atlet araǵa uzaq ýaqyt salyp, jarys jolyna shyqty, dep habarlaıdy QazAqparat Qazaqstannyń jeńil atletıka federatsııasyna silteme jasap.
Aımannan bólek, Galına ıAkýsheva da Shymkenttegi Qazaqstan chempıonatyna qatysty. Eki sportshy da - 20 shaqyrymǵa sporttyq júristen halyqaralyq dárejedegi sport sheberi. Birneshe ret álemdik dodalarda el namysyn qorǵaǵan.
Aıman egizi Sholpanmen birge 2012 jylǵy London Olımpıadasynda óner kórsetken. 2010 jyly Vetnamda, 2011 jyly Japonııada ótken Azııa chempıonattarynda qola medalǵa ıe bolǵan. Al Galına Reseıde ótken álemdik Gran-prıdiń jeńimpazy. Turmysqa shyqqan soń, sońǵy eki jyl sportpen ýaqytsha qoshtasqan.
Aımannyń úlken sporttan qol úzip qalǵanyna 4 jyl bolǵan. Alǵashynda 2013 jyly dopıngpen ustalyp, eki jylǵa shetteligen. Biraq 2015 jyldan bastap, sportqa oralýyna eshqandaı kedergi bolmaǵan edi.
Ekeýi de alǵashqy jarystaryn jastarǵa arnalǵan 10 shaqyrymnan bastaýdy jón kóripti. Ázirge ıAkýsheva men Qojahmetovanyń deńgeıin baǵalaý qıyndaý. Nátıjeleri de asa joǵary dep aıta almaısyń.
Bul qashyqtyqa resmı túrde almatylyq Ekaterına Shlykova jeńimpaz atandy. Anna Klınkova márege ekinshi keldi. Alǵashynda qatysýǵa ótinish bildirgen Svetlana Zalevskaıa jarys jolyna shyqqan joq. Sondaı-aq Ózbekstannyń qatysýshysy óner kórsetkenimen, jerlesterimizge básekeles bola almady.
Qysqy Qazaqstan chempıonaty. Shymkent, 30 naýryz. Sporttyq júris. 10 shaqyrym.
Boıjetkender:
1. Ekaterına Shlykova (Almaty) - 53.45.2 mın;
2. Anna Klınkova (OQO) - 57.28.0;
- Galına ıAkýsheva (ShQO) - 50.29.5 (chempıonattan tys);
- Aıman Qojahmetova (Almaty obl.) - 54.25.6 (chempıonattan tys).
