Aımaqtyq jáne transaımaqtyq yntymaqtastyqty tereńdetýde EQYU mańyzdy ról atqarady - QR Qorǵanys mınıstriniń orynbasary
; ALMATY. Qyrkúıektiń 16-sy. QazAqparat /Erlik Erjanuly/ - Aımaqtyq jáne transaımaqtyq yntymaqtastyqty tereńdetýdiń qajettiligi obektıvti túrde artady.
Bul jaıly búgin Almatyda ótip jatqan "Ortalyq Azııadaǵy jeńil jáne atys qarýlarynyń zańsyz aınalymymen kúres" dep atalatyn halyqaralyq semınarda sóz boldy.
"Qazaqstannyń 2010 jylǵy EQYU tóraǵalyǵy aımaqtyq saraptamalyq suhbatty bastaý men ony ilgeri jyljytýǵa múmkindikter jasaıdy. Bul Qazaqstannyń tóraǵalyǵynda jarııalanǵan basymdyqtar konteksinde Ujymdyq qaýipsizdik sharty uıymy, Shanhaı yntymaqtastyq uıymy, Azııadaǵy is-qımyl jáne senim sharalary jónindegi keńes sııaqty aımaqtyq uıymdarmen jańa tájirıbelik baılanysty ornatýda kórinis tabýda. Bul aımaqtyq uıymdar arasyndaǵy ózara árekettestik Ortalyq Azııada qaýipsizdiktiń ornyqty jáne tıimdi sáýletin qurýǵa kómektesedi», deıdi QR Qorǵanys mınıstriniń orynbasary Bolat Sembınov. Onyń aıtýynsha, bul úderis qazirdiń ózinde júrip jatyr. Kelisimder men memorandýmdar jasalyp, kezdesýler men konsýltatsııalar ótýde. Jeltoqsan aıynda Astanada ótetin EQYU-ǵa múshe memleket basshylary Sammıtindegi negizgi mindettiń biri - EQYU keńistigindegi qaýipsizdik pen yntymaqtastyq máselelerine nazar aýdartý bolyp otyr.
