Aımaqtyq telearnalar kontent sapasyn jaqsartýlary tıis - N. Orazov
ASTANA. 25 aqpan. QazAqparat /Jasulan Amanbaıuly/ - Aımaqtyq arnalar sandyq televızııanyń engen tusynda, jańa talaptar zamanynda aman qalý úshin kontent sapasyn jaqsartýlary tıis.
Bul týraly búgin Qazaqstan Ulttyq teleradıohabar taratýshylar qaýymdastyǵynyń múshelerimen kezdesýinde QR Baılanys jáne aqparat vıtse-mınıstri Nuraı Orazov málim etti.
Jınalǵandardy eldiń aqparattyq naryǵyndaǵy jaǵdaımen tanystyra ketken vıtse-mınıstr: Búginde aımaqtyq telearnalar efırleriniń sapasy jetkilikti deńgeıde emes. Olardyń basym bóligi sheteldik jáne respýblıkalyq telearnalardyń baǵdarlamalaryn taratýdyń negizinde ǵumyr keship jatyr. Sonyń saldarynan olar ózderiniń negizgi qyzmetteri men mindetterinen adasyp, shaǵyn jarnamalyq bıýdjettiń nemese memlekettik satyp alýdyń esebinen kúneltedi», - dep atap kórsetti.
Onyń sózine qaraǵanda, "jergilikti telearnalardyń iri respýblıkalyq telearnalarmen básekege túsýi jáne shaǵyn jarnamalyq bıýdjet qarjysyna aýqymdy televızııalyq baǵdarlamalar jasap shyǵarýy múmkin emes" degen aımaqtyq telearnalar basshylyǵynyń sanasynda sińip qalǵan jańsaq pikirge qaramastan, elde óz qyzmetin sátti dóńgelete alǵan óńirlik telearnalar da joq emes.
«Qoǵam sandyq televızııaǵa kóshken tusta aımaqtyq telearnalar sapaly kontent shyǵarýǵa talpynsyn, sebebi jarnama berýshiler BAQ-tyń tıimsizdigin sodan kóredi. Ne bolmasa damýdyń basqa sheshimderin pysyqtasyn: mysaly, taqyryptyq baǵytty tańdaýǵa bolady. Búgingi tehnıkalyq damýdyń nátıjesi osynda», - dedi N. Orazov.
