Aımaqtyq BAQ memlekettik tapsyrysty ózgertýdi surap otyr

Al memlekettik tapsyrys aıasynda birinshi kezekte respýblıkalyq jańalyqtardy berý mindeti bar, dep xabarlaıdy QazAqparat tilshisi.

"Bizge Parlamentti ber deıdi, Prezıdentti ber deıdi. Al kórermender sonyń bárin "Habar" men "Qazaqstannan" kórip aldyq dep aıtady. Sodan olar alǵashqy 10-15 mınýtty kórmeıdi de, jergilikti jańalyqtar bastalǵanda ǵana qosylady. Árıne, memlekettik tapsyrys qajet. Óıtkeni onyń aıasynda aqsha bólinedi. Biraq osy máseleni kórermenniń yńǵaıyna sheshýdi usynyp otyrmyz. Biz aımaqtyń jańalyǵyn kórseteıik, al respýblıkalyq jańalyqtardy respýblıkalyq arnalardan da kórip alýǵa bolady", - dedi Aǵybaev búgin Óńirlik BAQ forýmynda.

Fılıal basshysynyń aıtýynsha, memlekettik tapsyrysty basqa joldarmen de oryndaýǵa bolady. Osy oraıda Ortalyq kommýnıkatsııalar qyzmetin keńinen paıdalaný qajet. "Máselen, tapsyrys aıasynda mindetti áleýmettik medıtsınalyq saqtandyrý máselesi berilse, bizge árbir spıkerdi saǵattap jazyp bersin. Sosyn kontentti taratsyn. Biz odan spetseffekt te jasaımyz, xabar da jasaımyz, jańalyq ta jasaımyz. Al ony jergilikti ónim retinde de usynýǵa bolady. Sonda aımaqtyń kórermeni ondaı jańalyqtardy jeńil qabyldaıdy", - dep atap kórsetti Aǵybaev.

 QR Aqparat jáne kommýnıkatsııalar mınıstrliginiń Aqparat komıteti tóraǵasynyń orynbasary Rýslan Álishevtiń aıtýynsha, aldaǵy ýaqytta aımaqtar úshin memlekettik tapsyrysty ózgertý máselesi qaralady. "Iá, aımaqtarda xalyq jergilikti jańalyqtardy kórgisi keledi. Biz ony jaqsy bilemiz. Endi, osy saladaǵy jumysty bastadyq. Biz aqparattyq tapsyrysty memlekettik satyp alýlar júıesinen bólip shyǵardyq. Degenmen, aımaqtar ázirshe burynǵy júıe boıynsha jumys istep jatyr. Sol sebepti sál qıyndaý bolyp tur. Bıyl biz óz saraptamamyzdy qorytyndylap, tıisti esepti tapsyrǵannan keıin usynys jasaımyz. Úkimetke de shyǵamyz. Sonda aımaqtardaǵy jaǵdaı ózgeredi", - deıdi Álishev.

Foto: lada.kz