Aımaqtardaǵy densaýlyq saqtaý basqarmalary dári-dármekterdi óz baǵasynan birneshe esege qymbatqa satyp alyp keldi - V.Zverkov
ASTANA. Naýryzdyń 31-i. QazAqparat /Gúlmıra Álıakparova/ - Kepildendirilgen tegin medıtsınalyq kómek aıasynda aımaqtardaǵy densaýlyq saqtaý basqarmalary satyp alyp otyrǵan dári-dármekterdiń baǵasy, olardyń naqty baǵalarynan birneshe esege qymbat.
Bul týraly búgin ótken baspasóz máslıhatynda «SK-Farmatsııa» JShS-nyń bas dırektory Vadım Zverkov aıtty, dep habarlaıdy QazAqparat.
V.Zverkovtyń aıtýynsha, «SK-Farmatsııa» JShS ústimizdegi jyly kepildendirilgen tegin medıtsınalyq kómek aıasynda eń qymbat, biraq eń tıimdi dárilerdi satyp aldy. Biraq sonyń ózinde olardyń quny aımaqtardaǵy densaýlyq saqtaý basqarmalary buǵan deıin deldaldar arqyly satyp alyp kelgen baǵalardan birneshe paıyzǵa tómen.
Mysalǵa, «SK-Farmatsııa» ústimizdegi jyly «Larıtromıtsın» dárisin medıtsınalyq mekemelerge 25,9 teńgeden jetkizse, Ońtústik Qazaqstan oblysynyń Densaýlyq saqtaý basqarmasy ony 2009 jyly 359,9 teńgeden satyp alǵan. «Bul bizdiń baǵadan 1350 paıyzǵa kóp», - deıdi ol.
Kompanııa bıyl «Levofloksatsın» (ınfýzııaǵa arnalǵan eritindi 500 mg/100 ml) preparatynyń bir shynysyn 336,9 teńgeden jetkise, Soltústik Qazaqstan oblysynyń densaýlyq saqtaý basqarmasy ony ótken jyly 1600 paıyzǵa qymbat, ıaǵnı 5500 teńgege satyp alǵan.
Sondaı-aq Almaty oblysynyń Densaýlyq saqtaý basqarmasy 2009 jyly «Spıramıtsın» dárisin (1,5 mln.ME) 750 teńgege satyp alǵan bolsa, «SK-Farmatsııa» bıyl ony 75,9 teńgeden jetkizip bergen.
Astana qalasynda da jaǵdaı kóńil kónshiterlik emes. 2009 jyly elordalyq densaýlyq saqtaý basqarmasy «Ketamınniń» 1 ampýlasyn (2 ml ampýladaǵy egýge arnalǵan eritindi) 309,7 teńgege satyp alǵan bolsa, aǵymdaǵy jyly sol dárini «SK-Farmatsııa» 45,87 teńgege jetkizdi.
V.Zverkovtyń aıtýynsha, bul tek jekelegen mysaldar, olardyń sany áldaqaıda kóp. «Dári-dármekter toptap satyp alynatynyn eskersek, jergilikti oryndarda ne jaǵdaı bolyp kelgeni túsinikti», - deıdi ol.
