Aımaqtarda Óńirlik damý baǵdarlamasyn keńeıtý qarastyryldy
ASTANA. KAZINFORM — Qazaqstan Respýblıkasy Syrtqy ister mınıstriniń birinshi orynbasary Erjan Ashyqbaev elimizdegi BUU Damý Baǵdarlamasynyń Turaqty ókili Katarjına Vavernıamen kezdesýi ótkizdi. Bul týraly vedomstvonyń baspasóz qyzmeti habarlady.
Kezdesý barysynda taraptar osy jyldyń qorytyndylaryn jáne Qazaqstannyń BUU Damý Baǵdarlamasymen odan ári yntymaqtastyq josparlaryn talqylady.
Atap aıtqanda, BUUDB-nyń Qazaqstan úshin 2026-2030 jyldarǵa arnalǵan eldik baǵdarlamasynyń qabyldanýy, shilde aıynda Nıý-Iorkte ODM iske asyrý boıynsha úshinshi erikti ulttyq sholýdyń tabysty usynylýy, sondaı-aq densaýlyq saqtaý, genderlik teńdik, bilim berý jáne basqa da salalardaǵy áriptestiktiń nátıjeleri atalyp ótti.
Sonymen qatar, BUUDB-men jaqynda Almatyda ashylǵan Ortalyq Azııa men Aýǵanstan úshin ODM boıynsha Óńirlik ortalyq sheńberinde yntymaqtastyqty keńeıtý perspektıvalary, sondaı-aq BUUDB-nyń Óńirlik damý baǵdarlamasyn elimizdiń basqa aýdandaryna keńeıtý múmkindikteri qarastyryldy.
— Klımat, ekologııa jáne sý resýrstaryn basqarý, onyń ishinde Aral teńiziniń jaı-kúıine baılanysty máseleler de sáýir aıynda ótetin Óńirlik ekologııalyq sammıt qarsańynda mańyzdy talqylaý taqyrybyna aınaldy. Osyǵan oraı BUUDB ókilderi Sammıt aıasynda Ortalyq Azııa úshin klımattyq jáne ekologııalyq ınvestıtsııalardyń óńirlik portfelin qalyptastyrýǵa arnalǵan joǵary deńgeıdegi is-shara ótkizý josparyn habarlady, — delingen aqparatta.
Budan basqa, kezdesý barysynda resmı ashylýy jeltoqsan aıynda Nıý-Iorktegi BUU shtab-páterinde BUU Bas Assambleıasynda jarııalanǵan ornyqty damý múddesi úshin 2026 Halyqaralyq eriktiler jylyna oraı josparlanǵan is-sharalarǵa BUUDB-nyń qatysý múmkindikteri talqylandy.
Kezdesý qorytyndysy boıynsha taraptar strategııalyq áriptestikti odan ári tereńdetýge, yntymaqtastyqtyń basym baǵyttaryn iske asyrýǵa jáne Ornyqty damý maqsattaryna qol jetkizýge baǵyttalǵan birlesken jumysty jalǵastyrýǵa daıyn ekendikterin rastady.
Buǵan deıin BUU Damý baǵdarlamasy Qazaqstanda 4 jańa sý qoımasyn salýǵa atsalysatyny týraly jazdyq.