Aımaqtarda májilismender halyqty tolǵandyratyn máselelerdi talqylaýda
ASTANA. QazAqparat - Májilis depýtattary aımaqtardaǵy sapary barysynda turǵylyqty halyqpen kezdesýlerin jalǵastyrýda. Olar Aqmola jáne Shyǵys Qazaqstan oblystarynda boldy, dep habarlaıdy Májilistiń baspasóz qyzmeti.
Parlament Májilisiniń depýtaty, «Nur Otan» partııasy parlamenttik fraktsııasy jetekshisiniń orynbasary, Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov Shyǵys Qazaqstan oblysynyń Aıagóz, Kókpekti, Kúrshim aýdanyna baryp, saılaýshylarmen kezdesýler ótkizýde.
Júzdesýlerde Elbasynyń bes áleýmettik bastamasy men Parlamenttiń zań shyǵarýshylyq qyzmeti týraly aıtyldy.
Aýdan turǵyndary óz kezeginde aýyl sharýashylyǵyn, kásipkerlikti damytý, shaǵyn nesıeleý, turǵyn úımen, aýyz sýmen, gazben qamtamasyz etý, avtojoldardy jóndeý, halyqty jumyspen qamtý, áleýmettik qamsyzdandyrý, densaýlyq saqtaý, ınternet-baılanysty damytý jáne áleýmettik nysandardy salý sııaqty basqa da máselelerdi kóterdi.
Saılaýshylarmen kezdesýler ótkizý barysynda depýtat N.Sabılıanov sýmen jabdyqtaý nysandarynyń qurylysy men avtojoldardy rekonstrýktsııalaý barysymen tanysty.
Májilis depýtattary V. Oleınık, A. Qojahmetov, Q. Mýsın jáne I. Ýnjakova Shyǵys Qazaqstan oblysyndaǵy jumys sapary barysynda «Kaztsınkmash» JShS-niń eńbek ujymymen kezdesti.
Depýtattar Memleket basshysynyń jańa tehnologııalardy engizý, ónerkásip kásiporyndaryn jańǵyrtý jáne tsıfrlandyrý máseleleri boıynsha Joldaýynyń negizgi erejelerine toqtaldy.
Kezdesýde turǵyndar Elbasynyń bes áleýmettik bastamasynda aıtylǵan mańyzdy máselelerdi kóterip, suraqtaryn qoıdy. Olar «7-20-25» baǵdarlamasy boıynsha turǵyn úıdi satyp alý men elimizdiń joǵary oqý oryndarynda granttarmen oqytý máselelerine erekshe nazar aýdardy.
Májilis depýtattary Gúljan Qaraqusova men Tatıana ıAkovleva Aqmola oblysynyń Tselınograd aýdanyndaǵy Aqmol aýylynda «Jańa Servıs-2007» qyzmetkerlerimen kezdesti.
Búgingi tańda avtoklavty gaz-beton shyǵaratyn zaýyt tek aımaqty ǵana emes, Astananyń qurylys bazarlaryna zamanaýı jáne básekege qabiletti materıaldaryn jetkizip otyr.
Aqmola oblysyna issaparmen kelgen Májilis depýtaty Ersultan Bekturǵanov oblystyq ǵylymı kitaphanada zııaly qaýym ókilderimen kezdesti. Onda «Rýhanı jańǵyrý» aıasynda iske asyrylyp jatqan partııanyń jańa jobalary talqylandy. Olardyń biri - kitaphana júıesin jańǵyrtý.
