Aımaqtarda dári-dármek baǵasyn ustap turý boıynsha memorandýmdar jasaldy - QR DSÁDM
«Aǵymdaǵy jylǵy sáýir aıynan bastap, Qazaqstannyń barlyq oblystarynda, sondaı-aq Astana jáne Almaty qalalarynda ákimdikter, QR DSÁDM Medıtsınalyq jáne farmatsevtıkalyq qyzmetti baqylaý komıtetiniń departamentteri men farmatsevtıkalyq qaýymdastyqtar arasynda dárilik zattar men medıtsınalyq maqsattaǵy buıymdardyń baǵasyn ustap turý boıynsha memorandýmdarǵa qol qoıyldy», delingen habarlamada.
2015 jylǵy 30 naýryzda QR Densaýlyq saqtaý jáne áleýmettik damý mınıstrligi jáne kásibı farmatsevtıkalyq qaýymdastyqtary dárilik zattar men medıtsınalyq maqsattaǵy buıymdardyń 200 ataýyna baǵasyn ustap turý boıynsha yntymaqtastyq jónindegi memorandýmdarǵa qol qoıǵan bolatyn.
Vedomstvoda málim bolǵandaı, bul qujatqa qol qoıý maqsaty halyqtyń áleýmettik qaýqarsyz toptaryn qoldaý bolyp tabylady.
«Dárilik zattar men medıtsınalyq maqsattaǵy buıymdardyń otandyq jáne halyqaralyq óndirýshileri, dıstrıbıýtorlar jáne bólshek saýdanyń ókilderi 2015 jylǵy 1 naýryzdaǵy deńgeıinde baǵalardy bekitip, jıi qoldanylatyn dárilik zattar men medıtsınalyq maqsattaǵy buıymdardyń 200 ataýyna baǵany ustap turý týraly áleýmettik jaýapkershilikti ózderine aldy. Atap aıtqanda, qabynýǵa qarsy, aýyrsynýdy jáne dene qyzýyn basatyn preparattar, antıbıotıkterdiń keıbir túrleri, sondaı-aq, shprıtster jáne dákeler», - delingen mınıstrlik habarlamasynda.