Aımaqtar geoportaldaryndaǵy óńirlik málimetterdiń bárin tsıfrlandyrýdy aıaqtaýy tıis - Úkimet basshysy

NUR-SULTAN. QazAqparat – Aımaq ákimdikteri geoportaldaryndaǵy óńirlik málimetterdiń bárin tsıfrlandyrýdy aıaqtaýy tıis. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Bıyl bizdiń aldymyzda memlekettik qyzmetterdi 90 paıyzǵa avtomattandyrý deńgeıine qol jetkizý mindeti tur. Memlekettik organdar asa qysqa merzimde memleket kórsetetin qyzmetter tizimine engizý qajet ózgeristerdi pysyqtap, engizsin. Bul memlekettik qoldaý jónindegi 20 sharaǵa da qatysty. Jer máselesi boıynsha kórsetiletin qyzmetterdi avtomattandyrý jóninde ákimdikter geoportaldaryndaǵy óńirlik málimetterdiń bárin tsıfrlandyrýdy aıaqtap, jyljymaıtyn múliktiń biryńǵaı memlekettik kadastrymen ıntegratsııalaý qajet. Mańǵystaý oblysy búgingi kúnge deıin óziniń geoportaldaryna ınjenerlik jelilerindegi tsıfrlyq derekterdi salmaǵan. Oblys ákimi osyǵan nazar aýdaryp, tıisti jumysty qolǵa alýy kerek. Aýyl sharýashylyǵy mınıstrligine jer máselesi boıynsha kórsetiletin qyzmetter jónindegi normatıvtik aktilerge qajetti ózgertýlerdi engizýdi tapsyramyn», - dedi Asqar Mamın.

Úkimet basshysy Nur Otan partııasynyń saılaýaldy baǵdarlamasyndaǵy turǵyndar sany 250 adamnan asatyn eldi mekenderdi jyldamdyǵy joǵary ınternetpen qamtamasyz etý jónindegi is-sharalardy asyrý aıasynda baılanys operatorlarynyń jumys jospary áli kúnge deıin bekitilmegendigin basa aıtty.

«Partııa ókilderi men Parlament depýtattary tarapynan bul másele boıynsha syn da aıtyldy. Asqar Qýanyshuly, bul máseleni shuǵyl sheshińiz, tıisti jospardy bekitińizder. Bir apta merzimde Úkimetti habardar etińizder», - dedi Premer- Mınıstr QR Tsıfrlyq damý, ınnovatsııa jáne aeroǵarysh ónerkásibi mınıstri Asqar Jumaǵalıevke qarata.

Osy oraıda Asqar Mamın óńirlerdiń ákimdikterine atalǵan jospardy ýaqtyly iske asyrýǵa jan-jaqty qoldaý kórsetýge tapsyrma berdi.