Aımaqtar bıýdjetin muqııat josparlap, tabysyn arttyrýǵa basa mán berýge tıis – Prezıdent

– Aımaqtar óz bıýdjetin muqııat josparlap, tabysyn arttyrýǵa basa mán berýge tıis. Biz jergilikti bıliktiń áleýetin jáne aımaqtardyń qarjylyq derbestigin birtindep kúsheıtip jatyrmyz. Byltyr aýyldyq okrýgterdiń bıýdjeti 442 mıllıard teńgeden asty. Bul qarajattyń úshten biri – eldi mekenderdiń óz tabysy. Onyń ústine, elimizdegi aýyldyq okrýgterdiń ortasha bıýdjeti 190 mıllıon teńgege jetti. Bul – edáýir jaqsy kórsetkish.

Bıyldan bastap aýyldyq okrýgter qosymsha tabys kózine ıe bolmaq. Atap aıtqanda, keń taralǵan paıdaly qazbalar óndirisine, jerasty sýlary men emdik balshyqtardy paıdalanýǵa salynatyn salyqty ózderi jınap, qajetine jaratady. Meniń tapsyrmama sáıkes qazir Úkimet zańdy tulǵalarǵa jáne jeke kásipkerlerge salynatyn múlik salyǵynyń bir bóligin tórtinshi deńgeıdegi bıýdjetterge berý máselesin pysyqtap jatyr. Sondaı-aq aımaqtarǵa jekelegen qyzmet túrimen aınalysýǵa arnalǵan lıtsenzııalyq alymnan, ekologııalyq aıyppuldardan túsetin qarajat ta berilýi múmkin. Bul – óte durys ustanym. Túsken tabys, eń aldymen, sol aımaqty damytýǵa jumsalýy kerek. Bir sózben aıtqanda, jergilikti jerde qordalanǵan máselelerdi sheshý úshin múmkindik te, resýrs ta arta túspek, - dedi Prezıdent.

Memleket basshysy sondaı-aq máslıhattarǵa bıýdjet jobalarynyń kesh usynylýy depýtattardyń jumysyn qıyndatatynyn atap ótti. 

– Aımaqtarda bıýdjetti josparlaý jáne oryndaý jumysynyń sapasyn arttyrý aıryqsha mańyzdy. Men muny Úkimettiń jaqynda ótken keńeıtilgen otyrysynda aıttym. Qazirgi tártipke sáıkes jergilikti bıýdjet bekitiletin kezde depýtattarǵa jalpy málimet qana usynylady, tıisti túsiniktemeler berilmeıdi. Sondaı-aq bıýdjet jobasy máslıhattyń qaraýyna sońǵy sátte joldanady. Sol sebepti ony depýtattar ústirt qarap, qysqa merzim ishinde qabyldaýyna týra keledi. Sonyń saldarynan qarajat halyqtyń naqty qajettiligin ótemeıtin, tıimsiz jobalarǵa jumsalyp ketetin jaǵdaılar paıda bolady. Eshkimge naqty jaýapkershilik júktelmegen soń, másele suraýsyz qalady. Demek jergilikti deńgeıde tıisti baqylaý júrgizilmeıdi degen sóz. Sonyń bári jergilikti turǵyndardyń narazylyǵyn týǵyzady. Mundaı keleńsizdikke tosqaýyl qoıý úshin ókildi organ bıýdjetti josparlaý úderisine áýel bastan atsalysýy kerek. Biraq bıýdjet boıynsha barlyq talqylaý tek memleket pen óńirlik múddelerge negizdelýge tıis, lobbızmge nemese popýlızmge jol bermeý kerek. Basty ustanym – bári de halyq úshin, - dedi Qasym-Jomart Toqaev.

Eske sala keteıik, buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.