Aımaqtar boıynsha ınflıatsııa mamyr aıynda 19 óńirde báseńdedi - Ulttyq bank

ASTANA. QazAqparat – Qazaqstan Ulttyq Banki óńirler boıynsha mamyr aıyndaǵy ınflıatsııalyq úrdister týraly derekti jarııalady, dep habarlaıdy QazAqparat banktiń resmı saıtyna silteme jasap.

Elde jyldyq ınflıatsııa baıaýlap, 15,9% boldy (sáýirde – 16,8%). Aımaqtar boıynsha ınflıatsııa barlyq 19 óńirde báseńdedi. Al, Aqmola oblysynda burynǵy 17,6% deńgeıindegi mánin saqtaı otyryp, ózgergen joq.

Jyldyq ınflıatsııanyń eń joǵary máni Aqmola, Mańǵystaý jáne Soltústik Qazaqstan oblystarynda tirkeldi.

Azyq-túlik taýarlarynyń baǵasy j/j 16,5%-ǵa deıin (sáýirde – 17,9%) baıaýlady. Osy toptaǵy taýarlardyń baǵasy Mańǵystaý oblysynda (20,7%) barynsha joǵary, al Almaty qalasynda (14,3%) meılinshe tómen ósti.

Azyq-túlikke jatpaıtyn taýarlar baǵasynyń ósý qarqyny j/j 17,2%-ǵa deıin baıaýlady (sáýirde – 18,2%). Eń joǵary mán Astana qalasynda (23,6%), eń tómen mán Almaty oblysynda (14,1%) tirkeldi.

Aqyly kórsetiletin qyzmet baǵasy j/j 13,5%-ǵa deıin baıaýlady (sáýirde – 13,7%). Bul rette jalpy respýblıkalyq deńgeıden baǵa Aqmola oblysynda (18,1%) birshama joǵary, Astana qalasynda (10,2%) aıtarlyqtaı tómen ósti.

Eldegi aılyq ınflıatsııa 0,6%-ǵa ósti. Bul – tarıhı ortasha mánnen (2017-2021 jyldary mamyrda – 0,5%) joǵary.