Aımaqta keleshegi myqty gaz kenderi bar, solardy qolǵa alý kerek - Q. Kósherbaev
Májilisti ashqan oblys ákimi Qyrymbek Kósherbaev búgingi kúnde munaı baǵasynyń tómendeýi jáne kórshi memleket Reseı ekonomıkasynyń quldyraýy bizge ekonomıkany turaqtandyrýǵa jáne aımaq ónerkásibin ártaraptandyrýǵa sharalar qoldanýdy mindetteıtinin atap ótti.
«Elbasymyz elimizdiń ekonomıkalyq qaýipsizdigin qamtamasyz etýge asa mán berip otyr. Qazirgi tańdaǵy jaǵdaı bizdiń jınaqy bolýymyzdy jáne barlyq kúshterdi jumyldyrýymyzdy talap etedi. Osydan biraz ýaqyt buryn Qyzylorda oblysy áleýmettik-ekonomıkalyq damý boıynsha sońǵy orynda bolatyn, alaıda qazirgi tańda damý jaǵynan biz aldyńǵy bes kóshbasshy aımaqtyń ishindemiz. Qarjy mınıstrliginiń derekterine sáıkes, Qyzylorda oblysynda qarjynyń basym bóligi áleýmettik qajettilikterge jumsalady. Biz - margınaldyq jastarmen jumys jasaý boıynsha jol kartasy jasalyp jatqan jalǵyz aımaqpyz. Munyń qanshalyqty kúrdeli jáne mańyzdy másele ekenin ózderińiz de bilesizder», - dedi aımaq basshysy.
Otyrys barysynda munaı óndirýdiń tómendeýine baılanysty qajetti sharalar usynyldy. "Aımaqta keleshegi myqty gaz kenderi bar, solardy qolǵa alý kerek. Bul úshin parametrlik uńǵymalar qondyrý kerek, qazirgi tańda olardy qondyrýǵa qajetti qosymsha qarjylandyrý máseleleri sheshilýde", - dedi ákim.
Oblys turǵyndaryn jumyspen qamtý máseleleri de talqylandy.
«Biz jumyssyzdyq deńgeıin 5 paıyzǵa deıin tómendete jáne birqatar bereshek kompanııalardan jalaqy boıynsha qaryzdardy óndirip ala aldyq. Alaıda, jumysshylardyń ózderi de zańdy bilý jaǵynan saýattyraq bolyp, eńbek shartyn jasaýdy talap etýleri qajet», - dep sanaıdy aımaq basshysy.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jazıra Jylqyshıeva jáne birqatar áleýmettik mekemelerdiń basshylary halyqtyń áleýmettik turǵyda qorǵansyz bóligin qamtamasyz etýdiń jáne memlekettik baǵdarlamalardy iske asyrýdyń ártúrli qyrlary týraly aıtty.
Otyrysty qorytyndylaı kele, áleýmettik mekemelerge jumysshylardyń quqyqtaryna qysym jasaýdyń paıda bolýymen kúresý jáne halyqtyń ómir súrý sapasyn arttyrýǵa barynsha qoldaý kórsetý tapsyryldy.