Aımaq ákimderi qaýipti ınfektsııalardyń aldyn alý sharalaryn júrgizýi kerek - Alekseı Tsoı

NUR-SULTAN. QazAqparat – Aımaq ákimderi Kongo-Qyrym gemorragııalyq qyzbasy aýrýynyń aldyn alý sharalaryn qolǵa alýy kerek. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Qazaqstan aýmaǵynda tabıǵı oba, týlıaremııa, gemorragııalyq qyzba (gemorragııalyq qyzba, Kongo-Qyrym gemorragııalyq qyzbasy), sibir jarasy jáne basqa zoonozdy ınfektsııalar bar. Aldaǵy epıdemııalyq maýsymǵa baılanysty aımaq ákimderi turǵyndar arasynda erekshe qaýipti ınfektsııalardyń aldyn alý sharalaryn ýaqtyly júzege asyrý qajet», - dedi Alekseı Tsoı.

Onyń aıtýynsha, elimizdiń ońtústik aımaqtary Kongo-Qyrym gemorragııalyq qyzbasynyń jıiligi boıynsha endemıkalyq bolyp qala beredi.

«Kongo-Qyrym gemorragııalyq qyzbasynyń epıdemııalyq maýsymy bastalýy qarsańynda aımaq ákimderi bul aýrýdyń aldyn-alý sharasyn qolǵa alýy qajet. Atap aıtqanda: býferlik aımaqtardy qurý, mal men mal ǵımarattaryn, eldi mekenderdegi jeke sharýa qojalyqtaryn, qorshaý men onyń aınalasyn kenege qarsy óńdeý kerek.

Ótken jyldardaǵy tájirıbeni eskere otyryp, alǵashqy medıtsınalyq-sanıtarlyq kómek, shuǵyl medıtsınalyq kómek jáne basqa da tar mamandyqtardaǵy medıtsınalyq qyzmetkerlerdiń qyraǵylyǵy men daıyndyq deńgeıin arttyrý boıynsha sharalardy Kongo-Qyrym gemorragııalyq qyzbasyn erte anyqtaý jáne dıfferentsıaldy dıagnostıkalaý turǵysynan júzege asyrý qajet», - deıdi ol.