Aımaǵambetov jelide taraǵan aýyl mektebiniń múshkil jaǵdaıyn synǵa aldy

NUR-SULTAN. QazAqparat – QR Oqý-aǵartý mınıstri Ashat Aımaǵambetov BQO qarasty Dostyq aýyldyq mektebiniń múshkil jaǵdaıyn synǵa aldy, dep habarlaıdy QazAqparat tilshisi.

«Bir máselege nazar aýdarǵym kelip otyr. Áleýmettik jeliden kórdim. Vıdeoda BQO Báıterek aýdany Dostyq aýylyndaǵy mekteptiń jańa oqý jylyna daıyndyq máselesi kórinis tapqan. Mekteptiń oqý jylyna daıyndyǵynyń jetkilikti deńgeıde emes ekendigin kórsetip otyr. Mektepke kúrdeli emes aǵymdyq jóndeýdiń ózi der kezinde júrgizilmegeni kórinip tur. Sonda jaz boıy nemen aınalystyńyzdar? Bul qazirgi ýaqytta jarııalanǵan vıdeo ma álde eski me?» - degen saýal joldady Ashat Aımaǵambetov mınıstrlikte ótken apparattyq jınalys barysynda.

Sondaı-aq, vedomstvo basshysy jelide taraǵan vıdeony jıynǵa qatysýshylarǵa kórsetti.

Atalǵan jaıtqa baılanysty BQO boıynsha bilim basqarmasy basshysynyń orynbasary Svetlana Ibragımqyzy túsinik berdi.

«Bul vıdeony osy jazda atalǵan mektepke oblystyq bilim basqarmasynyń ókilderi barǵanda ata-analar túsirgen. Qazirgi ýaqytta jóndeý jumystary júrgizilip, 25 kabınet aqtaldy. Mektep 1982 jyly salynǵan, 610 orynǵa shaq. 2017 jyly Dostyq aýyly mektebine qatysty apat aldyndaǵy jaǵdaıda degen sheshim shyǵaryldy. Osy oraıda onyń ornyna 900 oryndyq jańa mektep salý jobasy jasaqtaldy. 2023 jyly jańa mektep salynady. Bul jerde sheshilmeı turǵan másele mekteptiń sportzaly sebebi tóbeden sý aǵyp tur. Bul jerde aǵymdyq jóndeý kómektespeıdi», - deıdi ol.

Sondaı-aq, basqarma basshysynyń orynbasary mınıstrdi atalǵan mektep jańa oqý jylyna deıin daıyn bolatynyn aıtyp sendirdi.