Aımaǵambetov: Jańa Qurylys kodeksiniń jobasynan asa mańyzdy normalar túsip qalǵan

ASTANA. KAZINFORM — Májilis depýtaty Ashat Aımaǵambetov jańa Qurylys kodeksiniń jobasynan mektep pen balabaqshalarǵa qatysty mańyzdy normalar alynyp qalǵanyn málim etti.

— Mektepter men balabaqshalar qurylystan keıin emes, qurylyspen birge paıda bolý kerek. Byltyr osy jerde bárimiz birge kóppáterli úılerdi mektep pen balabaqshasyz, emhanasyz salýǵa tyıym salatyn zań qabyldaǵan edik. Bul norma endi jumys isteı bastaǵan. Nege ekeni belgisiz, Qurylys kodeksiniń jobasynda ol norma joq bolyp shyqty. Nelikten, bul kimge tıimdi? On myńdaǵan otbasy kóship kelip jatyr, al balalaryn oqytatyn mektep joq. Biz shaǵyn aýdanda mektep pen balabaqsha, emhana joq bolsa, kóppáterli úı salýǵa jol joq ekenin aıqyn bekiteıik dep usyndyq, — dedi ol.

Mınıstrdiń sózinshe, balalar qaýipsizdigine arnalǵan norma da jańa kodekske enbeı qalýy múmkin.

— Bala qaýipsizdigi únem kózi emes. Byltyr osy jerde búkil áleýmettik nysandar men kópqabatty úılerdiń terezelerinde qaýipsizdik qulpy bolý kerek degen norma qabyldadyq. Óıtkeni jyl saıyn júzdegen bala terezeden qulap ólip jatyr. Taǵy da sol… Kodeks jobasyn ashyp qarasam, ol norma da túsip qalǵan. Nege? Iá, bálkim ol qymbat bolatyn shyǵar, qurylys kompanııasyna tıimsiz shyǵar. Biraq bala ómirinen qymbat dúnıe bar ma, aıtyńyzshy, — dedi depýtat.

Sondaı-aq, ol qurylys jobalaǵan kezde geologııalyq barlaý jumystary beıbereket júrgiziletinin synady.

— Geologııalyq barlaý salasynda jabaıy saýda qalyptasqanynan bastaıyn. Basqalaı aıtý múmkin emes. Mamandar geologııalyq qorytyndyny qurylys ornyna barmaı-aq satyp alýǵa bolatynyn aıtady. Tipti keıbireýler mańaıdaǵy 100 metr jerdiń eski derekterin taýyp, sony kóshirip qujatqa engize salady eken. Іs bitti. Qaǵazda bári ádemi, al shyn ómirde ǵımarat shytynap, qırap jatady, — dedi Májilis ókili.

Ashat Aımaǵambetov mektep pen balabaqshaǵa dep bólingen telimderge ýaqyt ozdyryp baryp túngi klýbtar salynyp jatqanyn aıtady.

— Mektep apatty dep tanylsa, ornyna úı salyp, jańa mektepti shetkeri aýdanǵa ysyra salǵan jaǵdaılar da bar. Biz mańaıynda balama nysan bolmasa, áleýmettik nysan qurylysyna bólingen jerdiń paıdalaný maqsatyn ózgertýge tyıym salýdy usynǵanbyz, — dedi ol.

Depýtat áleýmettik nysan salýǵa mindetteme alatyn memorandýmdar is júzinde jemqorlyqtyń bir arnasyna aınalǵanyn málim etti. 

— Zań sharshy metrler men qurylys kompanııalaryn, qaltalylardy emes, qarapaıym azamattardy birinshi qorǵaý kerek, — dedi depýtat.

Aıta keteıik, dál qazir Májilis qurylys qyzmetin qaǵazbastylyqtan aryltatyn qujatty qarap jatyr.