Aımaǵambetov: «Pedagog mártebesi týraly» zańdy jyl sońyna deıin qabyldaýymyz kerek
«Qazir eń bastysy – zań jobasyn qabyldaý. Qazir biz tek zań jobasy týraly sóz qozǵap otyrmyz. ıAǵnı, ol – áli zań emes. Memleket basshysynyń tapsyrmasyna sáıkes, atalǵan zań jobasy men zańdy jyldyń sońyna deıin qabyldaýymyz kerek», - dedi mınıstr Úkimet otyrysynan keıin tilshilerdiń suraǵyna jaýap bere otyryp.
Sonymen qatar, Ashat Aımaǵambetov muǵalimderdiń aılyǵy men qosymsha aqysyn kóterý qaı merzimge josparlanyp otyrǵanyn atap ótti.
«Bizdiń esepteýimizshe, depýtattar bizdi qoldap, jyldyń sońyna deıin zań jobasy qabyldanǵan jaǵdaıda bizde BǴM buıryǵy men Úkimet qaýlysyna saı keletin normatıvtik-quqyqtyq qujattardy qabyldaýǵa jetkilikti ýaqyt bolar edi. Kelesi oqý jylynan bastap biliktilik, dápterdi tekserý, synyp jetekshiligi men magıstr dárejesi úshin qosymsha aqy berile bastaýy kerek. Kelesi oqý jylyna deıin tolyq daıyn bolamyz dep otyrmyz. Osynaý josparlardyń bári de bıýdjet qarajatymen bekitilgen. Respýblıkalyq bıýdjettik komıssııanyń otyrysy ótti. Memleket basshysy tapsyrma bergennen keıin tıisti aqsha qarastyrylyp, bastamalardyń bári de qarajat turǵysynan qoldaý taýyp otyr», - dedi Ashat Aımaǵambetov.
Eske sala ketsek, búgingi Úkimet otyrysynda Ashat Aımaǵambetov muǵalimderdi ózine tán emes qyzmetke tartqandarǵa 120 AEK-ke deıin aıyppul salynatynyn habarlaǵan bolatyn.
