Aımaǵambetov qazaq mektepteri úlgeriminiń tómendigine qatysty tujyrymǵa pikir bildirdi

NUR-SULTAN. QazAqparat – Bilim jáne ǵylym mınıstri Ashat Aımaǵambetov qazaqstandyq oqýshylardyń úlgerim jaǵynan halyqaralyq zertteýge qatysý nátıjeleri týraly pikir bildirdi, dep habarlaıdy QazAqparat tilshisi.

«Jalpy taldaý ár oblys boıynsha júrgizildi. Onyń qorytyndysyn óńirlerge joldaýǵa daıynbyz. Áriptestermen bul máseleni jumys tártibinen bólek te talqylaǵan edik. Jumysty ary qaraı jandandyrý kerek. Jalpy Jambyl oblysy oqýshylarynyń PISA zertteýine qarasaq ta, TIMSS zertteýiniń nátıjesine qarasaq ta, respýblıkalyq olımpıadalardyń qorytyndysy boıynsha da kórsetkishteri óte joǵary. Bizde keıbir tereń úńilip qaramaıtyn baıqaýshylar bar: olar osy zertteýlerdiń qorytyndysyn qarap, qazaq tilindegi mektepterdiń kórsetkishteri tómenirek degen tujyrymdamaǵa keledi. Biraq ol durys emes ekenin kórip otyrmyz», - dedi Ashat Aımaǵambetov Bilim jáne ǵylym mınıstrliginiń apparat otyrysynda.

Mınıstrdiń aıtýynsha, mektepterdiń úlgerimi – tilge baılanysty másele emes, jalpy uıymdastyrýǵa, jumysty durys tártipke qoıý isine tikeleı qatysty.

«Mysaly TIMSS zertteýi boıynsha búgingi tańda Jambyl oblysy kósh bastap tursa, onda negizinen memlekettik tilde oqıtyn balalar osy nátıjege qol jetkizip otyr. Sondyqtan eń basty másele tilge qatysty emes. Jambyl oblysynyń tájirıbesin zerttep, basqa da óńirlerge taratýymyz kerek», - dedi Ashat Aımaǵambetov.