Aımaǵambetov: Endi jańa Konstıtýtsııa normalaryn naqty zańdarǵa aınaldyrý mańyzdy
ASTANA. KAZINFORM — Búgin Aqordada Konstıtýtsııany qabyldaýǵa arnalǵan saltanatty rásim ótti. Oǵan Májilis depýtaty Ashat Aımaǵambetov te qatysyp, pikir bildirdi.
Onyń aıtýynsha, Memleket basshysy jańa Konstıtýtsııa Qazaqstannyń jańa dáýirine jol ashatynyn atap ótti. Sondaı-aq qazaqstandyqtardyń el taǵdyryna ortaq jaýapkershilik pen birlik tanytqanyn erekshe aıtty.
— Ulttyń bolashaǵy bilimmen, ǵylymmen, ınnovatsııamen tikeleı baılanysty. Kóptegen elderdiń qarqyndy damýy jan-jaqty zerttelgen. Ártúrli ǵalymdar ártúrli faktorlardy ataıdy. Degenmen bárin jınaqtasaq, ortaq zańdylyq anyq kórinedi. Japonııa, Sıngapýr, Eýropa elderiniń tájirıbesi kórsetkendeı, tabys pen damý úsh negizgi tirekke súıenedi: tártip pen merıtokratııa (zań), bilim men qundylyqtarǵa ınvestıtsııa, qundylyqtardyń jańǵyrýy (aǵartý), jáne tulǵadan bıik turatyn myqty ınstıtýttar. Dál osy qundylyqtar jańa Konstıtýtsııada kórinis tapqan, — dep jazdy depýtat Telegram-daǵy paraqshasynda.
Sonymen qatar, Aımaǵambetov atap ótkendeı, endi jańa Konstıtýtsııa normalaryn naqty zańdarǵa aınaldyrý mańyzdy. Jáne de sol zańdardyń ómirde shyn máninde, múltiksiz jumys isteýin qamtamasyz etýimiz kerek.
— Qazirgi zamanda jasandy ıntellektti ıgerý ǵana emes, ony durys baǵytta qoldana bilý de sheshýshi faktorǵa aınalyp otyr. Eń mańyzdysy áli alda. Daýys berý — óte mańyzdy qadam. Biraq ol bir kún ǵana. Al Konstıtýtsııa kún saıyn jumys isteýi kerek. Muǵalimniń synybynda da, aýrýhanada da, sot zalynda da, memlekettik qyzmetshiniń kabınetinde de. Endi onyń normalaryn naqty zańdarǵa aınaldyrý mańyzdy. Jáne de sol zańdardyń ómirde shyn máninde, múltiksiz jumys isteýin qamtamasyz etýimiz kerek. Bul úshin basqarý mádenıetin ózgertý, zańdy bárine birdeı qoldaný, ınstıtýttardy nyǵaıtýymyz qajet. Bul — bıliktiń de, azamattardyń da ortaq isi, — dep túıindedi ol.
Buǵan deıin Memleket basshysy Qazaqstannyń jańa Konstıtýtsııasyn iske asyrý jónindegi sharalar týraly Jarlyqqa qol qoıdy.
Sondaı-aq, Qasym-Jomart Toqaev Konstıtýtsııa 1 shildeden bastap resmı túrde kúshine enetinin aıtty.
