Aımaǵambetov dári-dármek ǵylymy týraly: keıingi kezde QazVac-tan basqa eshteńe shyqqan joq

ASTANA. KAZINFORM —  Dári-dármek salasynda klınıkalyq zertteýler óte az. Bul týraly Parlament Májilisiniń jalpy otyrysynda depýtat Ashat Aımaǵambetov aıtty.

- Osy saladaǵy ǵylymǵa toqtalsaq, sońǵy ýaqytta QazVac-tan basqa eshteńe shyqqan joq deýge bolady. Klınıkalyq zertteýler óte az. Keıingi 10 jylda tek 2 preparat shyǵarylǵan, olardyń biri – «ıod jáne kalıı ıodıdi». Buny ázirleýge 4,6 mlrd teńge jumsalǵan, biraq ol tipti formýlıarǵa da engizilmegen, ıaǵnı qoldanylmaıdy, - dedi A.Aımaǵambetov palata otyrysynda dári-dármekpen qamtamasyz etý júıesine júrgizilgen memlekettik aýdıt nátıjesin talqylaý kezinde.

Onyń aıtýynsha, NATsELS-tiń (Dárilik zattar men medıtsınalyq buıymdardy saraptaý ulttyq ortalyǵy) klınıkalyq zertteýlerdi bekitý úshin deńgeıi jetkiliksiz.

- Sondyqtan klınıkalyq zertteýlerdi tolyǵymen júrgize almaımyz. Arnaıy ǵylymı granttar da joq. Kommertsııalandyrý jáne jeke ınvestıtsııa týraly aıtýǵa kelmeıdi, - dedi depýtat.

Budan buryn habarlanǵandaı, QR Joǵary aýdıtorlyq palatasynyń tóraǵasy Álıhan Smaıylov Qazaqstanda azamattardy dári-dármekpen qamtamasyz etý júıesine júrgizilgen memlekettik aýdıt nátıjesin jarııalady.

Sonymen qatar Májilisiniń jalpy otyrysynda depýtat Ashat Aımaǵambetov Qazaqstanda dárini tirkeý úshin óte kúrdeli bıýrokratııalyq rásimderden ótý kerek ekenin aıtyp, osy salany synǵa aldy.