Aımaǵambetov Astanadaǵy oqıǵa týraly: Ata-analardy jazalaý máseleni sheshpeıdi

ASTANA. KAZINFORM — Májilis depýtaty Ashat Aımaǵambetov keshe Astanadaǵy turǵyn úılerdiń birindegi lıftte bolǵan balaǵa shabýyl jóninde pikir bildirdi 

Асхат Аймагамбетов
Фото: Әділет Беремқұлов/Kazinform

− Jaqynda lıftte bolǵan oqıǵa — jaı ǵana tragedııa emes, ózekti máselelerdiń kórinisi ispettes. Bul jaǵdaı júıeli kemshilikterdi ashyp kórsetti: psıhıkalyq turaqsyz jasóspirim kez kelgen balaǵa shabýyl jasaýy múmkin edi. Munda tek ata-analardy jazalaý máseleni sheshpeıdi, erte anyqtaý, baqylaý, aldyn alý sekildi keshendi tásil qajet, − dep jazdy depýtat óziniń Telegram kanalynda. 

Májilis depýtaty psıhonevrologııalyq qyzmetterdi reformalaý keregin aıtýda. Atap aıtqanda, kámeletke tolmaǵandardyń psıhıkalyq buzylystaryn dıagnostıkalaý men emdeýdi jetildirý, ońaltý baǵdarlamalaryn damytý, minez-qulyqty baqylaý jáne týystaryn psıhıkalyq aýytqýlary bar adamdarǵa kútim jasaý erejelerine úıretýdi usyndy.

− Ata-analarmen jumysty kúsheıtý kerek. Eger qaýipti adam jaqyn mańda tursa, kórshiler men mektepti mindetti túrde habardar etý kerek. Esepte turǵan adamdardyń jaǵdaıy men minez-qulqyn júıeli tekserip, agressıvti azamattardy baqylaý, qaýip tóngen jaǵdaıda ýaqytsha oqshaýlaý múmkindigi bolýy qajet, − deıdi A. Aımaǵambetov.

Psıhıkalyq aýytqýy bar balalardy tárbıelep otyrǵan otbasylardy da qoldaý jóninde aıtyldy. Bul úshin áleýmettik qyzmetkerlerdi tartyp, úzdiksiz jáne basymdyqpen dári-dármekpen qamtamasyz etý kerek. Psıhologııalyq qyzmetterdiń jumysyn jandandyrý qajet.

− Ata-analarǵa kámeletke tolmaǵan balalarynyń quqyqbuzýshylyǵy nege ákep soǵatynyn túsindirý jumystaryn júrgizgen jón. Eger otbasy balany baqylaýda qıyndyqtarǵa tap bolsa, monıtorıng pen ońaltý qorytyndysy boıynsha qosymsha qoldaý sharalary qabyldanýy tıis. Bul jaǵdaıda barlyq qyzmetterdiń jedel áreket etip, bilikti medıtsınalyq kómek kórsetkenin jáne qylmystyq is qozǵalǵanyn atap ótken jón. Búldirshinniń tez saýyǵyp ketýin jáne myqty densaýlyq tileımin. Al biz psıhologııalyq qyzmetter salasyndaǵy máselelerdi sheshýge baǵyttalǵan zań jobasy boıynsha jumys istep jatyrmyz, − dedi Ashat Aımaǵambetov.

Aıta keteıik, keshe elordadaǵy turǵyn úılerdiń biriniń lıftinde belgisiz jasóspirimniń kishkentaı balaǵa pyshaqpen shabýyl jasaǵany týraly aqparat tarady. Shabýyl jasaǵan jasóspirim arnaıy psıhonevrologııalyq esepte turǵan.

Qazir balanyń ómirine esh qaýip tónip turǵan joq, onymen psıholog jumys isteýdi bastady.

Сейчас читают