Aılyqty kóbeıtý úshin jumys oryndaryn qysqartýdyń qajeti joq - SQO ákimi
PETROPAVL. QazAqparat - Soltústik Qazaqstan oblysynyń birneshe aýdanynda jumys oryndarynyń qysqartylyp jatqany baıqalyp otyr, dep habarlaıdy QazAqparat tilshisi.
Oblys ákimdiginiń otyrysynda óńir basshysynyń orynbasary Asqar Saqypkereev ortasha aılyq eńbekaqynyń artýymen birge keıbir aýdandarda jumys oryndary azaıyp ketkendigi baıqalatynyn habarlady.
«Birinshi toqsannyń qorytyndysy boıynsha jumysshylarǵa aýdarylǵan ortasha nomınaldy aılyq eńbekaqy ótken jyldyń sáıkes kezeńimen salystyrǵanda 8,9 paıyzdyq ósimmen 102 254 teńgeni quraǵan», - dedi Asqar Saqypkereev.
Ol sonymen qatar, eń joǵarǵy eńbekaqyny Petropavl qalasynyń, Qyzyljar men Maǵjan Jumabaev aýdanynyń turǵyndary alatynyn atap ótti. Sonymen birge, jalpy eseptegende aıyna 80 myń teńgeni Mámlút pen Ýálıhan aýdanynyń turǵyndary alyp otyr.
«Qysqarýdyń eń joǵary kórsetkishi Aqqaıyń aýdanynda tirkeldi. Barlyq kásiporyndar jabylyp qalǵan ba? Biz osy aýdanda barynsha kóp jumys oryndarynyń qurylǵanyna jaǵdaı jasap jatyrmyz. Al bul aýdanda bul baǵytta eshqandaı jumys atqarylyp otyrǵan joq. Bizdiń jobalar men ınvestıtsııalar qaıda?», - dedi aýdan ákimine qarata aıtqan sózinde oblys basshysy Qumar Aqsaqalov.
Aýdan ákimi Dáýren Baıtóleshov oblys ákiminiń suraǵyna kúmiljip jaýap bere almaǵanymen, jaǵdaıdy baqylaýǵa alýǵa ýáde berdi.
Qumar Aqsaqalov eńbek ınspektsııasyna qysqarýdyń barlyq jaǵdaıyn jiti tekserýdi tapsyrdy.
«Bıýdjetten bólinetin qarajat, ınvestıtsııalyq baǵdarlamalar artyp keledi. Bul jumys oryndarynyń kóbeıýine alyp kelýi tıis. Qys boıy árbir aýdan qansha adam jumysqa qabyldatyny týraly esep beredi. Oqytý júrip jatyr, mıkronesıeleý de artty. Óńir turǵyndary jáne men nátıjeni kórýimiz kerek», - dedi oblys basshysy.
Qumar Aqsaqalov jumys oryndaryn qysqartýdyń esebinen aılyqty kóbeıtýdiń qajeti joqtyǵyn atap ótti.
