Aılyqty 50 paıyzǵa ósirýge múmkindik beretin testti qansha muǵalim tapsyrady
«Muǵalimderdiń aılyqtarynyń ósýi 300 myńǵa jýyq jańartylǵan bilim mazmunynda oqıtyn ustazdy qamtıdy. Olardyń 18 myńy - tájik, ózbek, uıǵyr tilderinde sabaq beredi. Mamyr aıynda aılyqty qosymsha 50 paıyzǵa ósirýge múmkindik beretin Ulttyq biliktilik testine 60 myńnan astam muǵalim jazyldy. Biz muny kútken joqpyz. Bul degenińiz bizdiń muǵalimderdiń jasqanbaıtynyn, óz pánin biletinin, óz-ózine tolyǵymen senimdi ekenin kórsetedi», - dedi Erlan Saǵadıev.
Mınıstrdiń aıtýynsha, Bes áleýmettik bastama aıasyndaǵy tyń jobalar bilim salasynyń damýyna tyń serpin bereri anyq.
«Qazirgi tańda jańa granttardy bólýge, stýdentterdi jataqhanamen qamtýǵa baılanysty mınıstrlik naqty jospardy ázirledi. Úkimet qaýlysy qabyldandy. Qosymsha 20 myń grant mamandyqtar boıynsha bólindi. Ásirese, tehnıkalyq mamandyqtarǵa mańyz berilip otyr. Biz jumysqa turý jaǵyn da, tehnologııalyq damýymen birge ekonomıkanyń qurylymdy túrdegi ózgerisine qaraı ınjenerler, hımıkter men ІT salasyndaǵy mamandardy jumyspen qamtý jaǵyn eskerdik», - dedi Erlan Saǵadıev.
Aıta ketsek, elordadaǵy Beıbitshilik jáne kelisim saraıynda Elbasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVІ sessııasy ótip jatyr.
«Bes áleýmettik bastama - qoǵamnyń áleýmettik birliginiń tuǵyry» degen kún tártibimen bastalǵan sessııa jumysyna 1 500-den astam adam qatysýda. Olardyń qatarynda eldiń barlyq óńirlerinen kelgen Assambleıanyń ardagerleri, respýblıkalyq jáne óńirlik etnomádenı birlestikterdiń tóraǵalary, Parlament depýtattary, ortalyq atqarýshy organdardyń, saıası partııalardyń, dinı birlestikterdiń, úkimettik emes uıymdardyń basshylary, JOO rektorlary, shet memleketterdiń dıplomatııalyq mıssııalarynyń, ǵylymı, shyǵarmashyl zııaly qaýymnyń jáne BAQ-tyń ókilderi bar.
Sessııa sońynda saltanatty kontsert ótedi.
