Aılyǵy 25 AEK-ten tómen qazaqstandyqtardyń sany qansha
ASTANA. QazAqparat - Qazaqstanda jalaqyny 25 aılyq eseptik kórsetkishten tómen alatyn shamamen 2 mıllıon adam bar. Bul týraly búgin Úkimet úıindegi baspasóz máslıhatynda QR Eńbek jáne halyqty áleýmettik qorǵaý mınıstri Nurjan Áltaev aıtty, dep habarlaıdy QazAqparat.
«Jalaqysy 25 aılyq eseptik kórsetkishten tómen adamdardyń sany bizde shamamen 2 mıllıonǵa jýyqtaıdy. Olardyń qandaı salalarda ekenin de bilemiz. Menińshe, bul (salystyrmaly túrde jalaqysy tómen qazaqstandyqtardy qoldaý úshin 2019 jyldyń 1 qańtarynan bastap olardyń salyq júktemesin 10 esege azaıtyp, 1 protsent qana salyq salý) jumys berýshi úshin de, jumysshy úshin de úlken kómek bolady. Buryn salyqqa, eń birinshi kezekte jeke tabys salyǵyna ketken aqsha endi onyń qaltasynda qalady», - dedi ol.
Onyń paıymynsha, salyq jeńildiginiń arqasynda jumysshynyń qaltasyna túsetin aqshany az deýge kelmeıdi.
«25 aılyq eseptik kórsetkishten tómen jalaqy alatyn adamdar úshin bul aıtarlyqtaı az soma emes, kez kelgen somanyń áseri bar. Tipti ol 6 myń nemese 5 myń teńge bolsa da. Ony alatyn árbir adam úshin jaqsy kómek, qosymsha «syıaqy» desek te bolady», - dedi Nurjan Áltaev.
Aıta keteıik, QR Parlamenti palatalarynyń birlesken otyrysy QR Prezıdenti Nursultan Nazarbaev tómen jalaqy alatyndarǵa salyqtyq júktemeni jeńildetýdi usyndy.
«Salystyrmaly túrde jalaqysy tómen qazaqstandyqtardy qoldaý úshin 2019 jyldyń 1 qańtarynan bastap olardyń salyq júktemesin 10 esege azaıtyp, 1 protsent qana salyq salýdy usynamyn. Aı saıyn eń tómengi eseptik kórsetkishtiń 25 eselengen kóleminen az jalaqy alatyndarǵa salynatyn jeke tabys salyǵyn azaıtý arqyly olardyń salyq júktemesin jeńildetý kerek», - degen edi Memleket basshysy.
