«Aıqyn» jobasy azamattardyń ótinishterin memlekettik organdardyń naqty ýaqyt tártibinde qaraý barysyn baqylap otyrýǵa múmkindik beredi - QR Bas prokýratýrasy
ASTANA. 3 shilde. QazAqparat - Búgin Qazaqstan Respýblıkasy Bas prokýratýrasynyń Quqyqtyq statıstıka jáne arnaıy esepke alý jónindegi komıtetinde vedomstvo tóraǵasy S.Aıtbaevanyń qatysýymen brıfıng ótti, dep habarlady vedomstvonyń baspasóz qyzmeti.
Brıfıng barysynda S.Aıtbaeva BAQ ókilderine Bas prokýratýranyń «Aıqyn» kezekti ınnovatsııalyq jobasynyń respýblıka boıynsha kezeń-kezeńimen engizilýi týraly habarlady.
Azamattardyń ótinishterimen jumys bıliktiń halyqpen ózara is-qımylynyń mańyzdy nysany bolyp tabylady. Ókinishke oraı qazirgi ýaqytta jumys istep turǵan júıemen ótinish berýshige jedel, al keıde sapaly aqparat berý árdaıym múmkin emes. Oǵan mynadaı statıstıkalyq derekter dálel.
Statıstıkalyq málimetterge qaraǵanda, respýblıka boıynsha 2011 jyly jeke jáne zańdy tulǵalar memlekettik organdarǵa 20,5 mıllıon ótinish berse, olardyń 14 657-niń qaralý merzimi saqtalmaǵan.
Al ústimizdegi jyldyń 1-shi toqsanynda jeke jáne zańdy tulǵalar memlekettik organdarǵa 4 mıllıonnan astam ótinish bergen, olardyń 1 272-niń qaralý merzimi buzylǵan.
Elimizdegi zańdylyqty jáne quqyq tártibin qamtamasyz etý sheńberinde Qazaqstan Respýblıkasy Bas prokýratýrasynyń Quqyqtyq statıstıka jáne arnaıy esepke alý jónindegi komıteti ótinishterdiń qaralý barysynyń aıqyndylyǵyn, sondaı-aq sybaılas jemqorlyq áreketterge alǵyshart retindegi sheneýnikter men azamattardyń jeke qarym-qatynasyn boldyrmaýdy kózdeıtin «Aıqyn» jobasyn ázirledi.
Bul joba jeke jáne zańdy tulǵalardyń óz ótinishterin memlekettik organdardyń naqty ýaqyt tártibinde qaraý barysyn baqylap otyrýǵa múmkindik beredi. Mysaly, árkim óz ótinishi boıynsha qujattyń jyljýymen qatar, qaraý merzimderiniń buzylý derekterin de qosa baqylaı alady.
Jańa jobanyń maqsaty memlekettik organdardyń jeke jáne zańdy tulǵalardyń ótinishterin qaraý jónindegi jumysyn naqty ýaqyt rejımde turaqty túrde jurtshylyqtyń baqylaýyn jáne prokýratýra organdarynyń qadaǵalaýyn júzege asyrý bolyp tabylady.
Ótken jyly «Aıqyn» jobasy boıynsha Aqmola oblysy ákimdiginiń qurylymdyq bólimshelerinde arnaıy synaq júrgizildi. Kókshetaý qalasynyń ákimdigindegi ilki tájirıbe barysynda memlekettik organǵa júginip, talon alǵan 6 jarym myńnan astam adamnyń 70%-y «Aıqyn» júıesi arqyly ózderiniń ótinishteriniń qaralý barysyn baqylaı aldy.
«Aıqyn» jobasyn Qazaqstan Respýblıkasy Prezıdentiniń Ákimshiligi qoldady, endi ony búkil respýblıka aýmaǵynda engizý qajettigi týraly sheshim qabyldandy.
Joba 2012-2014 jyldar aralyǵynda kezeń-kezeńmen iske asyrylatyn bolady.
Osy jyldyń 1 shildesinen bastap «Aıqyn» jobasy Astana qalasynyń memlekettik organdarynyń apparattarynda engiziledi.
Ótinishti memlekettik organǵa óz qolymen bergen jaǵdaıda ótinish berýshi ótinishti qabyldaǵan keńse qyzmetkerinen 18 tańbaly biregeı nómiri bar talon alady.
Talonnyń biregeı nómirin paıdalana otyryp, ótinishtiń qaralý barysy jáne nátıjeleri týraly aqparatty - 8 800-080-7777 (statsıonarlyq), 1414 (uıaly) nómirlerine qońyraý shalyp jáne operatorǵa talon nómirin berip nemese 1012-ge talon nómirimen SMS - habarlama jiberip (barlyq baılanys operatorlaryna 15 teńgeden) Qazaqstan Respýblıkasy Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń http://service.pravstat.kz saıtyna kirip, «Memlekettik organdarǵa ótinish» bólimin tańdap, talon nómirin terip alýǵa bolady.
Osy tártip buzylǵan jaǵdaıda 115 nómiri arqyly QR Bas prokýratýrasynyń Sall - ortalyǵyna habarlasýǵa bolady.
«Aıqyn» jobasyn odan ári engizý bylaısha josparlanǵan:
- - oblys jáne Astana, Almaty qalalarynyń ákimdigi apparattarynda 2013 jyldyń 1 sáýirinen bastap;
- - aýdandyq jáne oblystyq máni bar qalalyq ákimdikter (Astana, Almaty qalalary) men oblystyq deńgeıdegi memlekettik organdar apparattarynda 2014 jyldyń 1 qańtarynan bastap;
- - qalalyq jáne aýdandyq máni bar memlekettik organdarda 2015 jyldyń 1 qańtarynan bastap.
«Aıqyn» jobasynyń ereksheligi sonda, ol alǵash ret azamattardyń jáne uıymdardyń óz ótinishteriniń qaralý barysyn Internet jelisi arqyly baqylap otyrýyna múmkindik beredi. Zamanaýı aqparattyq júıe - «Aıqyn» jobasyn engizý sybaılas jemqorlyqty joıýǵa ǵana emes, sybaılas jemqorlyq áreketterdiń barlyq alǵysharttarynyń aldyn alýǵa járdemin tıgizip, bul óz kezeginde azamattardyń konstıtýtsııalyq quqyqtaryn naqty qorǵaýdy qamtamasyz etedi.
