Aıqyn Qońyrov: Azamattar talapty saqtaý arqyly nysandardyń jumys isteýine múmkin beredi
NUR-SULTAN. QazAqparat – Halyq qaýipsizdik sharalaryn ustaný arqyly qyzmet kórsetý nysandarynyń jumys isteý múmkindigin saqtap qala alady. Qazaqstan kommýnıstik halyq partııasy Ortalyq komıtetiniń hatshysy, QR Parlamentindegi atalmysh partııa fraktsııasynyń jetekshisi Aıqyn Qońyrov osyndaı pikirin bildirdi, dep habarlaıdy QazAqparat tilshisi.
«Karantınniń ár qatańdatylýy aqsha tabý múmkindigine, ıaǵnı tólem qabiletine áser etedi. Bul degenimiz – árbir qazaqstandyqtyń qaýipsizdik sharalaryn saqtaýy naryqtaǵy, dúkenderdegi jáne qyzmet kórsetý salasyndaǵy basqa da obektilerdiń turaqty jumys isteýine yqpal etedi. Ókinishke qaraı, azamattar da, shaǵyn jáne orta bıznes te karantın sharalarynan zardap shekti. Eger adamdarda erejelerdi buzbaı qyzmet kórsetýge jáne taýar satyp alýǵa múmkindik bolmasa, onda kásipkerler tabysyn joǵaltady. Tıisinshe, kóptegen qazaqstandyqtar úshin jumys oryndary jabylady», - deıdi «Halyqtyq kommýnıster» fraktsııasynan depýtat Aıqyn Qońyrov.
Onyń aıtýynsha, halyq qaýipsizdik sharalaryn ustaný arqyly qyzmet kórsetý nysandarynyń jumys isteý múmkindigin saqtap qalamyz.
«Árıne, bul Úkimetti barlyq áleýmettik toptarǵa qoldaý kórsetýdi uıymdastyrý jaýapkershiliginen bosatpaıdy. Maskalardyń, antıseptıkterdiń, dári-dármekterdiń, sapaly medıtsınalyq qyzmetterdiń bolýy máselesin eshkim kún tártibinen shyǵarmaıdy.
Biz osy qıyn kezeńde azamattyq sanany kórsetip, bir-birimizdi barynsha qoldaýymyz kerek. Qaýipsizdik erejelerin saqtaı otyryp, qyzmet kórsetý nysandaryn paıdalaný múmkindigin saqtaımyz. Qazaqstan halqy retinde biz bul synaqqa tek birigý arqyly qarsy tura alatynymyzdy umytpaýymyz qajet», - deıdi ol.
Aıta keteıik, 13 tamyzda QR Premer-Mınıstri Asqar Mamınniń tóraǵalyǵymen ótken memlekettik komıssııa otyrysynda karantın sharalaryn kezeń-kezeńimen alyp tastaý jospary bekitildi.
